Знойдзеная старажытная маленькая птушка, падобная да тукана

Яе астанкі знайшлі на Мадагаскары.

Падчас экспедыцыі на Мадагаскар група даследчыкаў з Універсітэта Агаё ў ЗША выявіла рэшткі дыназаўраў. Сярод іх ляжалі дробныя косткі і чэрап, якія не належалі рэптыліям. Пасля раскопак каманда адвезла іх у лабараторыю для далейшага вывучэння. Вынікі аналізу апублікавалі ў часопісе Nature, паведамляе Naked science.

Знойдзеная закамянеласць месцамі была тонкай, як папера, - гэта рабіла працу цяжкай, аднак дзюба, частка верхняй сківіцы і вачніцы захаваліся досыць добра. Навукоўцы выкарысталі метады лічбавага мадэлявання і візуалізацыі, каб аднавіць вонкавы выгляд старажытнай птушкі. Затым яны надрукавалі на 3D-друкарцы атрыманы чэрап і параўналі яго з парэшткамі розных відаў.

Высветлілася, косці належалі птушцы з вымерлай групы энанцыарнісаў, якая жыла ў мезазойскай эры, прыкладна 66-72 мільёны гадоў таму. У яе была галава даўжынёй блізу дзевяці сантыметраў, вялікая, падобная да касы дзюба з адным зубам на канцы, а таксама цела, па памерах здольнае параўнацца з целам вароны. Таксама ў яе не было доўгага хваста і прымітыўных рыс, характэрных для старажытных птушак, такіх як археаптэрыкс. Вонкава яна была падобная да невялікага тукана.

«Калі я ўпершыню ўбачыў здымак чэрапа, то наважыў, што гляджу на сучаснага тукана, які нейкім чынам апынуўся замураваны ў бетонным грудзе», - распавёў Стывен Брусат, супрацоўнік Эдынбургскага ўніверсітэта ў Вялікабрытаніі, які не ўдзельнічаў у даследаванні. Навукоўцы назвалі птушку Falcatakely forsterae.

Нягледзячы на вонкавае падабенства з туканамі і птушкамі-насарогамі, пабудова касцей у фалькатаклі былазусім іншай. Дзюба старажытнай птушкі мела прымітыўную будову, але сучасную форму. Алан Тэрнер з Універсітэта Стоўн-Брук у Нью-Ёрку назваў гэта прыкладам канвергентнай эвалюцыі: калі не звязаныя арганізмы развіваюць адну і тую ж рысу незалежна адзін ад аднаго.

Тое, што фалькатаклі не падобная ні на адну вядомую птушку мезазою, дае права выказаць здагадку, што існавалі і іншыя жывёлы з незвычайнай будовай. Цяпер працягваюцца раскопкі на паўночным захадзе Мадагаскару, таму палеантолагі спадзяюцца, што змогуць знайсці астанкі іншых, пакуль невядомых відаў.