Брытанскія знішчальнікі перахапілі разведвальныя самалёты РФ над Паўночным морам
12- 29.11.2020, 13:37
- 19,405
ВПС Вялікабрытаніі назвалі дзеянні Расеі правакацыяй.
Раніцай у суботу, 28 лістапада, брытанскія знішчальнікі Typhoon былі паднятыя ў паветра з авіябазы Лосімут у Шатландыі для суправаджэння двух разведвальных самалётаў Ту-142 ВМФ Расеі, што праляталі над акваторыяй Паўночнага мора паблізу межаў паветранай прасторы Злучанага Каралеўства.
Пра гэта гаворыцца ў паведамленні, распаўсюджаным прэс-службай ВПС Вялікабрытаніі.
RAF Typhoon fast jets were scrambled from @RAFLossiemouth this morning to intercept Russian military aircraft operating over the North Sea near UK airspace.
— Royal Air Force (@RoyalAirForce) November 28, 2020
Full story: https://t.co/Ge48jnGHj2 pic.twitter.com/uJCa9A2rqC
У дакуменце сцвярджаецца, што расейскія вайсковыя самалёты могуць ствараць пагрозу іншым паветраным суднам у брытанскім раёне палётнай інфармацыі над Паўночным морам, бо рэдка адказваюць на запыты авіядыспетчараў.
«Каб стрымліваць гэтую правакацыйную дзейнасць і знізіць рызыкі, звязаныя з палётамі расейскіх вайсковых самалётаў у ажыўленых раёнах міжнароднай паветранай прасторы, «Тайфуны» ВПС Злучанага Каралеўства суправаджалі два расейскія самалёты, што старанна адсочвалі іх перамяшчэнне», - гаворыцца ў паведамленні.
У ім таксама адзначана, што брытанскім ВПС аказвалі садзейнічанне саюзнікам па NATO, а знішчальнікі папоўнілі ў паветры запасы гаручага ад самалёта-запраўшчыка Voyager, які вылецеў з брытанскай авіябазы Брайза-Нортан.
Прэс-служба Каралеўскіх ВПС апублікавала фота аднаго з перахопленых самалётаў ВМФ РФ з бартавым нумарам RF-34057.
