У Бельгіі стварылі COVID-вакцыну на аснове прышчэпкі ад жоўтай ліхаманкі

Яе ўжо выпрабавалі на мышах, хамяках і макаках.

На базе прышчэпкі ад жоўтай ліхаманкі навукоўцы стварылі хуткадзейную вакцыну ад каранавіруса новага тыпу. Яе бяспеку і эфектыўнасць паспяхова праверылі на мышах, хамяках і малпах. Артыкул з апісаннем даследавання апублікаваў навуковы часопіс Nature (пераклад - «ТАСС»).

Вакцыны ад каранавіруса новага тыпу цяпер распрацоўваюць і выпрабоўваюць па ўсім свеце. Апошнія фазы клінічных выпрабаванняў некаторых прэпаратаў плануюць скончыць ужо ў пачатку 2021 года.

Вірусолагі пад кіраўніцтвам прафесара Лёвенскага каталіцкага ўніверсітэта (Бельгія) Ёхана Нейтса распрацавалі яшчэ адну такую вакцыну. Яе стварылі на аснове віруса YF17D – больш слабай версіі ўзбуджальніка жоўтай ліхаманкі. Менавіта гэты вірус навукоўцы абралі, таму што YF17D ужо выкарысталі для стварэння дзвюх іншых вакцын - ад японскага энцэфаліту і ліхаманкі дэнге.

У геном YF17D навукоўцы ўсталявалі фрагменты РНК каранавіруса, якія адказваюць за зборку некаторых сегментаў двух ключавых кампанентаў яго абалонкі - S-бялку і N-бялку. Стварыўшы культуру такіх вірусных часціц, навукоўцы праверылі іх дзеянне на мышах, хамяках і макаках-крабаедах.

З аднаго боку, доследы пацвердзілі, што эксперыментальная вакцына была бяспечная для ўсіх выпрабаваных жывёл. З іншага ж выявілася, што гэтыя вірусныя часціцы дзейнічалі на імунітэт млекакормячых незвычайна хутка. Ужо праз дзесяць дзён пасля першай ін'екцыі яны прымушалі імунітэт выпрацоўваць рэкордна шмат антыцелаў.

Нейтс і ягоныя калегі мяркуюць, што дзякуючы такім уласцівасцям вакцына асабліва цікавая для далейшых клінічных выпрабаванняў на людзях.