Упершыню ў гісторыі штучны інтэлект кіраваў самалётам ВПС ЗША

ШІ шукаў ракетныя ўстаноўкі апанента, а пілот кіраваў самалётам і шукаў варожы самалёт.

Рэактыўны самалёт ВПС ЗША стаў першым вайсковым самалётам, які выкарыстаў алгарытм штучнага інтэлекту ў якасці другога пілота. Вышынны самалёт U-2 Dragon Lady вылецеў з авіябазы ВПС Біл (Каліфорнія) з дапамогай алгарытму штучнага інтэлекту пад назвай ARTUμ.

Пра гэта паведамляе «Новое время» са спасылкай на New Atlas.

У выніку трохгадовай распрацоўкі, ARTUμ быў спраектаваны і навучаны Федэральнай лабараторыяй баявога авіяцыйнага камандавання ВПС ЗША для выканання канкрэтных задач у палёце, якія звычайна выконваюцца пілотам. Падчас выпрабавальнага палёту ШІ кіраваў датчыкамі і тактычнай навігацыяй, каб дапамагчы адбіць імітацыю атакі зенітных ракет ад іншага дынамічнага камп'ютэрнага алгарытму падчас разведвальнай місіі.

Апынуўшыся ў паветры, інтэлект узяў на сябе кіраванне датчыкамі, выкарыстоўваючы ідэі, атрыманыя алгарытмам у выніку паўмільёна камп'ютэрных сімуляцый. Як паведамляе выданне, пілот і ARTUμ працавалі як адна каманда: ШІ шукаў ракетныя ўстаноўкі апанента, а пілот кіраваў самалётам і шукаў варожы самалёт.

Мэтай выпрабавальнага палёту было паказаць, што ARTUμ функцыянуе і можа супрацоўнічаць з пілотам-чалавекам для выканання задач, якія дазволяць пілоту засяродзіцца на больш важных справах. Канчатковая мэта праекту - удасканаліць тэхналогію на аснове звестак дэманстрацыйнага палёту і зрабіць яе даступнай для іншых сістэм.