Уладзімір Някляеў: Беларуская апазіцыя рыхтавала народ да сённяшняга пратэсту

Як наспявала беларуская рэвалюцыя.

Беларускі палітык, кандыдат у прэзідэнты 2010 года і былы палітвязень Уладзімір Някляеў распавёў "Настоящему времени" пра вытокі беларускай рэвалюцыі.

Паэт і палітык адказаў на пытанне, чым адрозніваюцца цяперашнія пратэсты ад акцый 2010 года:

- Змяніліся маштабы, а прынцыпы засталіся тыя ж. Здушэнне ўсякага вальнадумства, усякага супраціву цяперашняму таталітарнаму беларускаму рэжыму. Ёсць праблема і розніца, мне здаецца, у тым, што ў 2010 годзе недастаткова было народнай сілы, народнай волі для таго, каб змяніць сітуацыю ў Беларусі. Але ставала лідараў пратэстаў. Цяпер, на жаль, сітуацыя выглядае наадварот. Дастаткова сілы, дастаткова народнай волі, але ёсць востры дэфіцыт у лідарстве, і пра гэта ўжо кажуць вельмі многія.

- Як вы думаеце, адкуль сіла і воля народа ўзялася праз 10 гадоў?

Не раптам гэта ўсё з'явілася. Можна, вядома, справу падаваць так, што гэта нейкі цуд, ніхто не чакаў ад народа, што ён зможа падняцца на барацьбу за свабоду. Няпраўда, гэта ўсё рыхтавалася доўгія гады. З самага пачатку ад прыходу да ўлады Лукашэнкі беларуская апазіцыя, перш за ўсё "Беларускі народны фронт", пратэставала супраць наогул самога інстытута прэзідэнцтва ў Беларусі, увогуле, неўласцівага характару беларусаў, і тым больш супраць прыходу і ўтрымання ўлады Лукашэнкам. Спрабавалі наладзіць імпічмент - не атрымалася. Усе гэтыя гады, чвэрць стагоддзя, па сутнасці, беларуская апазіцыя рыхтавала народ да гэтага пратэсту. Так што не ўсё і не раптам. Прычым гэта адбывалася не толькі ў палітыцы, але і ў культуры, што вельмі важна.