Беларусы выкрылі былых супрацоўнікаў «Беркута», якія ўцяклі ў менскі АМАП

Пракуратура Украіны абяцае праверыць прозвішчы.

Сярод цяперашніх беларускіх амапаўцаў, якія ўдзельнічаюць у разгонах мірных пратэстаў у Менску, беларускія журналісты змаглі ідэнтыфікаваць былых супрацоўнікаў украінскага спецпадраздзялення "Беркут". Менавіта беркутаўцы ў 2013-2014 гадах удзельнічалі ў жорсткіх разгонах удзельнікаў пратэстаў на Майдане ў цэнтры Кіева. Пасля прыходу да ўлады новай палітычнай каманды многія з іх уцяклі ад следства. Адны былі заўважаныя ў анэксаваным Крыме, іншыя - у Расеі, і вось цяпер некалькі чалавек апынуліся сярод супрацоўнікаў беларускіх спецпадраздзяленняў, паведамляе currenttime.tv.

У цэнтры Менска 15 ліпеня затрымліваюць прыхільнікаў апазіцыі. Прэзідэнцкая кампанія ў Беларусі ўжо ў разгары. На відэа падчас затрымання амапаўцамі праграміста Аляксандра Куўшынава, які спрабаваў праехаць праз ачапленне сілавікоў на ровары, карыстальнікі інтэрнэту ідэнтыфікавалі былога ўкраінскага беркутаўца Сяргея Панасенку. Цяпер ён у форме беларускага АМАПу.

У 2017 годзе, падчас папярэдніх пратэстных падзей у Беларусі, Панасенка таксама быў фігурантам журналісцкага расследавання. Міжнародная супольнасць InformNapalm тады сцвярджала, што беларускі бок узяў на службу былых супрацоўнікаў украінскага “Беркута”.

Пра іх удзел ужо ў падзеях 2020 года пісала беларуская служба Радыё Свабода. Цяпер новыя доказы апублікаваныя ў матэрыяле беларускага выдання «Новы час».

Тут таксама фігуруе прозвішча Панасенка - ужо не грамадзяніна Украіны, а, як сцвярджаюць журналісты, грамадзяніна Беларусі. Пасля таго як Панасенка ўпершыню ідэнтыфікавалі ў 2017-м падчас затрыманняў удзельнікаў пратэстаў, у сацыяльных сетках ён змяніў прозвішча і імя, выдаліў усе свае фатаграфіі. Але яго ўсё адно пазналі летам 2020 года, падчас затрымання таго самага праграміста на ровары.

Наступны фігурант расследавання - экс-беркутавец Сяргей Гаўрыляк. Праўда, журналістам удалося атрымаць доказы ўдзелу Гаўрыляка толькі ў падзеях 2017 года ў якасці супрацоўніка беларускага АМАПа. На цяперашніх пратэстах ён заўважаны не быў. У сацыяльных сетках Гаўрыляк зарэгістраваны пад выдуманымі прозвішчам і імем, доступ да сваёй старонцы ён абмежаваў.

Яшчэ адзін фігурант журналісцкага расследавання - Анатоль Прымак. Ён з'ехаў з Украіны пасля перамогі Майдана. Атрымалася знайсці яго фота са спаборніцтваў у рукапашным баі сярод супрацоўнікаў міліцыі, якія праходзілі ў Менску ў студзені 2017 года. Тады дзяржаўнае выданне “СБ. Беларусь Сегодня” пісала пра яго як пра супрацоўніка менскага АМАПа. Прымак таксама пачысціў свае сацыяльныя сеткі, выдаліўшы фота і ўсю інфармацыю аб папярэднім і цяперашнім месцы працы.

Аднак 6 сакавіка 2020 года імя былога ўкраінскага беркутаўца было заўважана ў справе Цэнтральнага раённага суду Менску. Прымак быў выкліканы ў суд у якасці сведкі паводле справы беларускага грамадскага актывіста Мікалая Дзядка. Праўда, на пасяджэнне Прымак не з'явіўся нібыта з-за хваробы.

Дзяржаўнае выданне “СБ. Беларусь Сегодня” сваёй публікацыяй ад 2018 года аб чарговым пасяджэнні менскіх сілавікоў дапамагло ідэнтыфікаваць яшчэ аднаго ўкраінскага экс-беркутаўца - Дзмітрыя Анцупава. 26 кастрычніка 2020 года тэлеграм-канал, які выкрывае асобы сілавікоў, якія маюць дачыненне да разгону мірных акцый у Беларусі, з'явілася інфармацыя аб тым, што былы ўкраінскі беркутавец Дзмітрый Анцупаў з'яўляецца інспектарам аддзела спецыяльнай падрыхтоўкі АМАП у Менску.

Раней беларуская служба Радыё Свабода адпраўляла запыт у МУС Беларусі з просьбай патлумачыць, колькі былых украінскіх супрацоўнікаў спецпадраздзялення "Беркут" зараз працуюць у краіне, але адказу не атрымала.

“Настоящее время” звярнулася таксама ў аддзел украінскай пракуратуры, якая займаецца расследаваннямі злачынстваў, учыненых у дачыненні да ўдзельнікаў украінскага Майдану ў 2013-2014 гадах, у тым ліку супрацоўнікамі “Беркута”. Там паабяцалі праверыць прозвішчы заўважаных у беларускіх пратэстах экс-беркутаўцаў і даць адказ, ці знаходзяцца яны ў вышуку і ці фігуруюць ў матэрыялах расследаванняў.