Абама, Клінтан і Буш будуць агітаваць амерыканцаў за вакцынацыю ад COVID-19
10- 3.12.2020, 15:39
- 13,855
Палітыкі гатовыя прайсці вакцынацыю ў жывым эфіры.
Некалькі былых прэзідэнтаў ЗША на тэлевізіі будуць агітаваць за вакцынацыю ад каранавіруса COVID-19, каб павысіць давер амерыканцаў да вакцыны.
Тэлеканал CNN паведамляе, што за вакцынацыю будуць агітаваць Барак Абама, Біл Клінтан і Джордж Буш-малодшы.
«Нарэшце, я магу выступіць у эфіры або запісаць на камеру працэс вакцынацыі, каб людзі ведалі, што я давяраю навуцы», - сказаў Абама.
Кіраўнік адміністрацыі Буша-малодшага Фрэдзі Форд заявіў аб тым, што ягоны шэф звярнуўся да галоўнага інфекцыяніста Энтані Фаўчы і да каардынатара Белага дома ў рэагаванні на COVID-19 Дэбора Біркса, каб даведацца, як ён можа дапамагчы ў прасоўванні вакцыны.
Прадстаўнікі Клінтана таксама паведамілі аб згодзе экс-прэзідэнта на праходжанне вакцынацыі ў жывым эфіры.
Перад гэтым брытанская газета The Guardian у рэдакцыйнай калонцы заклікала палітыкаў трымацца далей ад праграмы вакцынацыі насельніцтва, бо грамадская насцярожанасць адносна вакцыны ўжо стала сур'ёзнай перашкодай на фоне агульнага недаверу да ўлады.
20 лістапада амерыканская карпарацыя Pfizer і яе нямецкі партнёр BioNTech перадалі запыт на экстранае выкарыстанне вакцыны ад COVID-19 ва Управу санітарнага нагляду за якасцю харчовых прадуктаў і медыкаментаў СШA. Чакаецца, што разгляд запыту зойме мінімум некалькі тыдняў.
Раней кампаніі заявілі аб 95% эфектыўнасці прэпарата ў трэцяй - фінальнай - стадыі клінічных выпрабаванняў.