У Малдове праходзяць пратэсты супраць спробаў пазбавіць Санду кантролю над спецслужбамі
4- 3.12.2020, 17:20
- 22,668
Сацыялісты спрабуюць зрабіць гэта за некалькі тыдняў да ўступлення новаабранага прэзідэнта на пасаду.
Тысячы прыхільнікаў абранага прэзідэнта Малдовы Маі Санду выйшлі ў чацвер на акцыю пратэсту супраць спробы парламента краіны пазбавіць Санду магчымасці кантраляваць органы бяспекі за некалькі тыдняў да ўступлення ў пасаду, паведамляе Голас Амерыкі.
Санду (у мінулым - эканамістка, якая працавала ў Сусветным банку), якая імкнецца ўмацаваць сувязі Малдовы з Захадам, атрымала перамогу над дзейным прамаскоўскім прэзідэнтам краіны Ігарам Дадонам. Пры гэтым у парламенце Малдовы дамінуюць сацыялісты - хаўруснікі Дадона.
У апошнія гады палітычнае жыццё Малдовы было адзначанае нестабільнасцю і карупцыйнымі скандаламі.
Санду ахарактарызавала крокі, накіраваныя на пазбаўленне яе магчымасці кантраляваць Службу інфармацыі і бяспекі як спробу ўзурпацыі ўлады.
«Народ прагаласаваў за нас на выбарах, каб мы пакаралі злодзеяў і вярнулі народу скрадзеныя грошы», - сказала Санду ў звароце да ўдзельнікаў дэманстрацыі.
«Злодзеі спалохаліся, яны хочуць захаваць ранейшыя карупцыйныя схемы, хочуць выкінуць голас народа на памыйніцу», - дадала яна.
Сацыялісты сцвярджаюць, што, паколькі Малдова з'яўляецца парламенцкай рэспублікай, кантроль над спецслужбамі павінен належаць парламенту.
Падчас дэманстрацыі прыхільнікі Санду крычалі «Далоў мафію!» і «Далоў Дадона!». Многія ўдзельнікі акцыі былі ў масках праз пандэмію COVID-19.
Праца парламента была спыненая пасля таго, як заканадаўцы з партыі Санду, падтрыманыя і прадстаўнікамі іншых груповак, блакавалі цэнтральную трыбуну.