Вярхоўны суд Нідэрландаў адмовіў Расеі ў адтэрміноўцы выплаты $57 мільярдаў акцыянерам ЮКАСа

Суддзі не знайшлі аргументаў для задавальнення хадайніцтва расейскіх уладаў.

Вярхоўны суд Нідэрландаў адхіліў хадайніцтва Расеі паводле справы ЮКАСа. Расейскія ўлады прасілі прыпыніць выкананне пастаноў паводле пазоваў былых акцыянераў кампаніі, якім павінны выплаціць 57 мільярдаў даляраў, паведамляе тэлеканал «Дождь».

Суд ацаніў, як скасаванне або прыпыненне пастановы паўплывае на два бакі, і не знайшоў аргументаў для задавальнення хадайніцтва расейскіх уладаў. «Былыя акцыянеры ЮКАСа могуць прадаўжаць дамагацца выканання арбітражных пастаноў да канчатковага выраку паводле справы», - паведаміў суд.

Судовае разбіральніцтва паміж былымі акцыянерамі ЮКАСа і расейскімі ўладамі пачалося яшчэ ў 2005 годзе. Тады тры кампаніі, звязаныя з адным з былых акцыянераў, падалі пазовы ў Міжнародны арбітраж ў Гаазе з патрабаваннем спагнаць з Расеі блізу 100 мільярдаў даляраў.

У лютым 2020 года апеляцыйны суд Гаагі стаў на бок былых акцыянераў ЮКАСа і абавязаў Расею выплаціць 50 мільярдаў даляраў у якасці кампенсацыі і яшчэ сем мільярдаў даляраў пені. Расея папрасіла Вярхоўны суд Нідэрландаў прыпыніць выплату.

Справа ЮКАСа пачалося ў 2003 годзе, калі нафтавую кампанію абвінавацілі нібыта «ў нясплаце падаткаў». Суўладальнік кампаніі Міхаіл Хадаркоўскі і прадпрымальнік Платон Лебедзеў былі арыштаваныя і прысуджаныя да пазбаўлення волі, Хадаркоўскі вызваліўся ў снежні 2013 года, Лебедзеў - у студзені 2014-га.