Навукоўцы высветлілі, колькі трэба трэніравацца, каб кампенсаваць сядзячую працу

Праведзенае даследаванне з удзелам 44 370 чалавек з 4 краін.

Відавочна, што сядзячая праца не ідзе на карысць нашаму здароўю - асабліва цяпер, калі многія працуюць з дому і нават не ездзяць у офіс. Новае даследаванне мяркуе, што дастаткова ўсяго 30-40 хвілін актыўных заняткаў на дзень, каб нівеліраваць негатыўныя наступствы такога ладу жыцця, піша healthinfo.ua.

Як паведамляюць навукоўцы, менавіта столькі фізічнай актыўнасці сярэдняй ці высокай інтэнсіўнасці неабходна для кампенсацыі 10-гадзіннага сядзення за сталом. Зрэшты, нават калі вы проста будзеце час ад часу ўставаць і хадзіць па офісе ці кватэры, арганізм будзе вам удзячны.

Да такой высновы даследнікі прыйшлі пасля мета-аналізу дзевяці папярэдніх тэстаў, у якіх узялі ўдзел 44 370 чалавек з 4 краін. Яны высветлілі, што «ў актыўных людзей, якія займаюцца фізічнай актыўнасцю сярэдняй ці высокай інтэнсіўнасці цягам 30-40 хвілін на дзень, сувязь паміж працяглай маларухомасцю і рызыкай смерці істотна не адрозніваецца ад тых, хто не вядзе маларухомы лад жыцця». Прасцей кажучы, менш за гадзіну практыкаванняў на дзень дастаткова, каб знізіць рызыку ранняй смерці да ўзроўню людзей, якія не сядзяць за сталом па 10 гадзін штодня.

Хоць такі метааналіз заўсёды патрабуе складанай карэляцыі паміж асобнымі даследаваннямі з рознымі добраахвотнікамі, часовымі рамкамі і ўмовамі, перавага гэтага канкрэтнага даследавання палягае ў тым, што яно заснаванае на адносна аб'ектыўных звестках з прылад накшталт фітнэс-трэкераў, якія насілі ўсе ўдзельнікі, а не на іх словах.

Не абавязкова хадзіць у спартзалу: вы адчуеце сябе лепш, калі пачняце падымацца па лесвіцы замест уздыму на ліфце, гуляць з дзецьмі і хатнімі жывёламі, займацца ёгай або танцаваць, займацца хатнімі справамі, хадзіць пешшу і ездзіць на ровары - усё гэта залічваецца. Даследнікі адзначаюць, што не трэба гнацца за 30-40 хвілінамі адразу: пачніце з малога і падумайце, як можаце павялічыць нагрузку без адрыву ад спраў.