Паліклінікі спынілі планавую медыцынскую дапамогу: што рабіць, калі захварэў або патрэбны рэцэпт

Як дзейнічаюць электронныя рэцэпты.

У менскіх паліклініках часова спынілі планавую дапамогу. Прычына - у «эпідэмічнай сітуацыі што да захворвання на каранавірусную інфекцыю», а таксама - своечасовае наданне медычнай дапамогі хворым на COVID-19 пацыентам і кантактных з імі асоб. Такую пастанову прыняў камітэт аховы здароўя Менскага гарвыканкама, піша kp.by.

Мяркуючы з усяго, для саміх паліклінік гэта было досыць нечакана.

- Я прыйшла да лекара, дык у рэгістратуры пакуль адна супрацоўніца мне талон дала, іншая атрымала факс пра спыненне планавага прымання, - расказала Алена, якая да лекара прыйшла з невялікай траўмай. - Яны самі разгубіліся. Кажуць, будзем на дзверы вешаць аб’яву, а што рабіць... А потым, пакуль я чакала прымання, у паліклініку напхалася сціжма люду. Мабыць, усе прыйшлі, каму трэба было найбліжэйшым часам да лекара. Чула, як адна жанчына прасіла "Прапусціце, калі ласка, я тры месяцы чакала прымання ў неўролага, усе абследавання і вынікі аналізаў з сабой!" Што цяпер рабіць?

Усе маюць тыя ж пытанні. Што трапляе ў катэгорыю планавай дапамогі? І што рабіць, калі, напрыклад, моцна забалела вуха або спіну скруціла - самім лячыцца або ў хуткую дапамогу тэлефанаваць?

- Калі нешта ў вас баліць, то, вядома, лекар Вас прыме, - супакоілі ў даведачнай службе 22-й паліклінікі Менска. - Іншая рэч, калі Вы мелі гадамі адны і тыя ж праблемы, і за Вамі назіраў лекар - тады, магчыма, трэба пачакаць з візітам, калі Вас, вядома, нічога не турбуе. А калі вушка забалела - гэта ж пільна.

- А калі матэрыял на аналіз трэба здаць?

- Калі трэба - здасце, доктар вас накіруе. Не хвалюйцеся, усім дамо дапамогу!

У 29-й сталічнай паліклініцы таксама запэўнілі, што не пакінуць пацыентаў па-за ўвагай.

- Траўматалогія дакладна будзе працаваць, цяжарных будзем абслугоўваць. Шмат працы пераносіцца на дом. Калі будуць выклікаць лекара, будзем глядзець на сітуацыю, да каго пойдзе доктар, да каго - памочнік лекара, а да каго - медсястра. Хранічных хворых будзем абслугоўваць дома. Калі трэба, і матэрыял возьмем дома, і ЭКГ зробім. Ніхто кінуты не будзе, - расказаў лекар паліклінікі. - Праз тэлефон на нейкія пытанні адказваем, рэцэпты выпісваем і дастаўляем на дом пацыентам. У нас электронныя рэцэпты вельмі развіты. Гэта вельмі зручна - не трэба прыходзіць па бланкі папяровыя, рэцэпт адразу накіроўваецца ў аптэкі. Толькі для льготных катэгорый грамадзян электронны рэцэпт мае пацвярджацца папяровым носьбітам.

А вось цяжарным раяць назірацца дыстанцыйна і ў паліклініку прыходзіць толькі пры пагрозе перынатальных і матчыных ускладненняў.

- Вядома, пракантраляваць стан плоду і будучай мамы дыстанцыйна праблематычна. Як вымераць вышыню стаяння дна маціцы, паслухаць сэрцабіцце плоду і запісаць КТГ дыстанцыйна? Але з іншага боку, цяжарнасць - гэта не хвароба, таму пры адсутнасці нейкіх цяжкай спадарожнай паталогіі і пры добрым пачуванні ненаведванне паліклінікі - гэта аптымальна ў нашай цяперашняй сітуацыі, - мяркуе лекар-гінеколаг адной з паліклінік. - А займацца ў школе падрыхтоўкі да цяжарнасці і родаў можна без праблем дыстанцыйным фармаце.

Каб дапамагчы паліклінікам даць рады наплыву каранавірусных хворых, Міністэрства аховы здароўя распарадзілася прыцягнуць да працы студэнтаў Беларускага дзяржаўнага медуніверсітэта, адправіўшы іх у паліклінікі на перыяд «росту захворвання» на каранавірус.

- Так, нашы студэнты сапраўды залучаныя ў дапамозе лекарам у менскіх паліклініках, - расказалі ў ВНУ. - Гэта студэнты чацвёртага, пятага і шостага курсаў. Іх колькасць безупынна мяняецца, на гэты момант лекарам дапамагаюць 1100 нашых студэнтаў. Залучана некалькі факультэтаў.

- Ці бяруць студэнты, якія працуюць з ковіднымі пацыентамі, нейкую заплату?

- Так, для іх прадугледжаны тыя ж прэферэнцыі, як і для лекараў, якія працуюць у чырвонай зоне. Гэта значыць, яны атрымліваюць грашовыя выплаты.

Як працуюць электронныя рэцэпты

Цяпер сапраўды самы час успомніць пра электронныя рэцэпты! Некалькі гадоў таму ва ўсіх сталічных паліклініках пачалі выдаваць зялёныя пластыкавыя карткі памерам з візітоўку - «Карткі для медыцынскага абслугоўвання». Часам пра іх пытаюцца, калі нешта купляеш у аптэцы. Пры паказе атрымліваеш невялікую зніжку. Гэтая ж картка можа працаваць як электронны рэцэпт. Калі вы купляеце лекі не на льготных умовах, і вам патрэбны прэпарат, які Вы прымаеце ўвесь час, то можна затэлефанаваць у паліклініку, паведаміць, якія лекі трэба выпісаць - і адпраўляцца ў аптэку.

Але ёсць тры важныя нюансы:

- Удакладніце, ці працуе сістэма электронных рэцэптаў у вашай паліклініцы.

- Абавязкова высветліце, калі дакладна рэцэпт будзе гатовы (гэта не робіцца зараз жа), каб не хадзіць у аптэкі дарма.

- Электронныя рэцэпты абслугоўваюцца пакуль толькі ў сетцы дзяржаўных аптэк «Белфармацыя».