З'явіўся трэйлер беларускага фільма, дзе зняліся толькі беларускія артысты

Фільм распавядае пра інтрыгі магнатаў Рэчы Паспалітай.

Кінастудыя «Беларусьфільм» апублікавала трэйлер фільма «Авантуры Пранціша Вырвіча», які быў зняты паводле рамана Людмілы Рублеўскай. Гэта адзін з рэдкіх айчынных кінапраектаў, у якім прынцыпова былі задзейнічаныя толькі беларускія артысты. Стужка выйдзе ў пракат 19 сакавіка, паведамляе tut.by.

Генеральны дырэктар кінастудыі Уладзімір Карачэўскі, які выступіў таксама генпрадусарам праекта, назваў гісторыка-прыгодніцкі праект «беларускімі гардэмарынамі». Рэжысёрам-пастаноўшчыкам стаў Аляксандр Анісімаў.

Сюжэт фільма будуецца вакол юнага шляхціца са збяднелага праваслаўнага роду. Пранціш Вырвіч вымушаны бегчы з Менскага езуіцкага калегіума, адпомсціўшы выкладчыку латыні за смерць свайго сябра. У шляху Пранціш выпадкова становіцца ўладальнікам незвычайнай «маёмасці» - доктара, алхіміка і навукоўца Бутрамея Ледніка, вымушанага пайсці ў слугаванне праз пазыкі. Сустрэча становіцца для герояў лёсавызначальнай - горды і адчайны шляхціц Вырвіч, харызматычны доктар Леднік і ягоная ўмілаваная Саламея Рэніч трапляюць у вір інтрыг уплывовых магнатаў вакол трона Рэчы Паспалітай. Героі гатовыя бараніць не толькі свой гонар і свабоду, але і са зброяй у руках заступіцца за гонар радзімы.

У стужцы зняліся Іван Трус, Георгій Пятрэнка, Вераніка Пляшкевіч, Сяргей Юрэвіч, Вячаслаў Паўлюць, Яўгенія Анікей, Віктар Манаеў, Сяргей Савянкоў, Канстанцін Міхаленка, Дзмітрый Есяневіч.