Навукоўцы знайшлі ў ДНК жыхароў Заходняй Афрыкі гены невядомых відаў людзей

Яны складаюць ад 2% да 19% ад усіх генаў.

Навукоўцы з Каліфарнійскага ўніверсітэта ў Лос-Анджэлесе знайшлі ў геноме жыхароў заходнеафрыканскіх народаў ёруба і мендзе сляды генаў невядомага вымерлага віду людзей. Даследаванне апублікавалі ў часопісе Science Advances, на яго звярнуў увагу CNN, паведамляе RTVI.

Генетыкі Аруна Дурвасула і Шрырам Шанкарараман з дапамогай метадаў кампутарнага мадэлявання здолелі пабудаваць карты геномнага паходжання народаў ёруба і мендзе на аснове даследавання 405 геномаў.

Навукоўцы высветлілі, што ад 2% да 19% генаў у іх ДНК належаць невядомаму вымерламу віду людзей. Даследчыкі выказалі здагадку, што продкі гэтых народаў блізу 25-45 тысяч гадоў таму крыжаваліся з гэтым відам людзей, якія адкалоліся ад дрэва Homo ад 600 тысяч да 1 млн гадоў таму, задоўга да з'яўлення неандэртальцаў і дзянісаўцаў.

Цяпер дакладна вядома, што продкі сучасных людзей крыжаваліся з неандэртальцамі і дзянісаўцамі: у геному жыхароў Еўразіі ёсць гены неандэртальцаў, а ў жыхароў Аўстраліі і Акіяніі - дзянісаўцаў. Да нядаўняга часу навукоўцы меркавалі, што змешванне адбывалася ўжо пасля таго, як чалавек разумны выйшаў з Афрыкі.

Гэта зацвярджэнне зняпраўдзілі даследчыкі Прынстанскага ўніверсітэта, якія знайшлі ў геноме афрыканцаў сляды скрыжавання з неандэртальцамі. На думку генетыкаў, яны з'явіліся праз зваротныя хвалі міграцый з Еўразіі ў Афрыку продкаў сучаснага чалавека.

Даследаванне навукоўцаў з ЗША можа давесці, што невядомы дагэтуль від Homo жыў у Афрыцы да нядаўніх паводле эвалюцыйных мерак часоў. Археалагічныя адкрыцці таксама пацвярджаюць тэорыю: у Афрыцы знаходзяць парэшткі людзей узростам 10-16 тысяч гадоў з нехарактэрнымі для жыхароў позняга каменнага стагоддзя характарыстыкамі, напрыклад, занадта прымітыўнымі рысамі.