28 сакавiка 2024, Чацвер, 21:38
Падтрымайце
сайт
Сім сім,
Хартыя 97!
Рубрыкі

Рух супраць БелАЭС мае намер спыніць запуск атамнай станцыі

12
Рух супраць БелАЭС мае намер спыніць запуск атамнай станцыі

Літоўскі рух адправіць ліст Лукашэнку і накіруе петыцыю ў Еўрапарламент.

15 лютага ў парламенце Літвы прайшоў першы з'езд Руху супраць Астравецкай АЭС. На першым з'ездзе прысутнічалі вядомыя літоўскія і замежныя палітыкі: кіраўнік аднаўленчага Сойма Літвы Вітаўтас Ландсбергіс, цяперашні спікер Сойма Віктарас Пранцкеціс, былы кіраўнік МЗС Украіны Павел Клімкін, еўрадэпутат ад Літвы Пятрас Аўштравічус і іншыя. Беларусь прадстаўлялі кіраўнік «Беларускіх хрысціянскіх дэмакратаў» Павал Севярынец, кіраўнік цэнтра «Еўрапейскі дыялог» Анатоль Лябедзька і кіраўнік беларускай партыі зялёных Дзмітрый Кучук, паведамляе карэспандэнт Charter97.org.

ФОТА: CHARTER97.ORG

Нобелеўская лаўрэатка, пісьменніца Святлана Алексіевіч вітала ўдзельнікаў першага з'езду Руху супраць Астравецкай АЭС праз тэлефон. Алексіевіч адзначыла, што ўлады Беларусі вынеслі нуль урокаў з Чарнобыля. Нобелеўская лаўрэатка дадала, што Крэмль «усё яшчэ трымае нас на павадку» і адным з метадаў уплыву на ўлады Беларусі можа быць ціск з боку Заходніх краін.

У прывітальным слове першы фактычны кіраўнік Літвы пасля аднаўлення незалежнасці Вітаўтас Ландсбэргіс нагадаў, што будаўніцтва беларускай АЭС суправаджаецца мноствам інцыдэнтаў, пра якія пішуць СМІ і паведамляе дзяржаўны дэпартамент Літвы. Палітык назваў будаўніцтва БАЭС халтурай і адзначыў, што тыя шматлікія інцыдэнты, пра якія мы ведаем - гэта толькі верхавіна айсберга, бо беларускі бок і «Расатам» хаваюць частку інцыдэнтаў, што адбыліся падчас будаўніцтва. «Тэмпы будаўніцтва там важнейшыя за людзей і бяспеку», - заявіў Ландсбэргіс.

Рух супраць Астравецкай АЭС ставіць перад сабой мэту спыніць будаўніцтва небяспечнай станцыі, дамагчыся, каб адмова ад куплі электраэнэргіі з яе стала законам не толькі ў Літве, але і ва ўсім Еўразвязе.

Пазіцыя прадстаўнікоў Беларусі

На з'ездзе руху выступілі і прадстаўнікі Беларусі - кіраўнік «Беларускіх хрысціянскіх дэмакратаў» Павал Севярынец, кіраўнік цэнтра «Еўрапейскі дыялог» Анатоль Лябедзька і кіраўнік беларускай партыі зялёных Дзмітрый Кучук. Усе яны падзякавалі Літве за ініцыятыву і за запрашэнне на форум.

«Астравецкая АЭС - гэта расейская ядзерная бомба, якую падклалі пад самыя межы Еўразвязу - за 45 км ад Вільні. Гэта стратэгічны праект Пуціна ў гібрыднай ядзернай вайне, якой ён палохае ўсё чалавецтва. Зроблены гэты праект рукамі дыктатара Лукашэнкі. Зараз на Захадзе мы чуем упэўненыя галасы: «Давайце падтрымаем Лукашэнку, давайце закрыем вочы на Астравецкую АЭС, бо Лукашэнка - гарант незалежнасці Беларусі ад Крамля». Напраўду Лукашэнка - гарант толькі ўласнай дыктатарскай улады», - сказаў у сваёй прамове кіраўнік «Беларускіх хрысціянскіх дэмакратаў» Павел Севярынец.

Кіраўнік цэнтра «Еўрапейскі дыялог» Анатоль Лябедзька ў сваім выступе адзначыў, што ў мінулым годзе восем беларускіх партый падпісалі дакумент, які фіксуе стаўленне да АЭС. «Гэты дакумент вельмі сугучны таму, пра што мы гаворым сёння тут», - растлумачыў палітык.

«Калі вы паедзеце да АЭС, вы ўбачыце ўказальнік - «Беларуская АЭС». Больш правільна было б паставіць іншы ўказальнік - «пуцінска-лукашэнкаўская АЭС», таму што з пункту гледжання перспектывы будучыні - там няма нічога беларускага. Ад беларускага там толькі грошы падаткаплацельшчыкаў - 10 млрд крэдыту, які будуць аддаваць нашы людзі. Сёння мы бачым праблему не толькі для беларусаў, але і для ўсяго насельніцтва ЕЗ», - заявіў Лябедзька.

Кіраўнік беларускай партыі зялёных Дзмітрый Кучук нагадаў, што Беларусь больш за іншых пацярпела ад Чарнобыльскай АЭС, але не вынесла з гэтага належных урокаў.

«Лукашэнка аднаасобна сваім указам прыняў пастанову аб будаўніцтве АЭС. Будаўніцтва вядуць падрадчыкі без адпаведнай ліцэнзіі і гэта вядзе да нездавальняючай якасці працы, станцыя ўжо забрала некалькі чалавечых жыццяў. Беларусь не выконвае рэкамендацыі місіі МАГАТЭ. Замест развязання праблем улады займаюцца пустой балбатнёй, у краіне няма спецыялістаў, якія могуць весці эксплуатацыю станцыі. Мы заклікаем міжнародную супольнасць звярнуць увагу на гэтую будоўлю як на бомбу запаволенага дзеяння», - заявіў Кучук.

Петыцыя і ліст Лукашэнку

На з'ездзе быў зацверджаны тэкст петыцыі Еўрапарламенту і ліст да Аляксандра Лукашэнкі. У петыцыі - пяць патрабаванняў:

- прыняць пастанову аб тым, што на беларускай атамнай электрастанцыі падчас будаўніцтва першага рэактара былі дапушчаныя сур'ёзныя парушэнні, галоўнае з якіх - выбар пляцоўкі.

- заклікаць ядзерныя рэгулятары Беларусі не выдаваць ліцэнзію на эксплуатацыю АЭС у неналежным месцы. Калі ўлады Беларусі і Расатам наважаць працягнуць будаўніцтва другога, трэцяга і чацвёртага рэактараў, ЕЗ павінен патрабаваць іх перамяшчэння і закрыцця або перамяшчэння першага рэактара.

- заклікаць Еўрапейскую камісію і Еўрапейскую Раду выказаць поўную салідарнасць з Літвой у тым, што Астравецкая АЭС пагражае нацыянальнай бяспецы і прыняць законы, якія забараняюць імпарт электраэнэргіі з гэтай станцыі.

- заклікаць Еўрапейскую камісію, Раду Еўрапейскага Звязу, асацыяваныя краіны і стратэгічных партнёраў ЕЗ разгледзець пытанне аб санкцыях супраць Расатама і іншых кампаній, якія адказваюць за будаўніцтва і маркетынг на Астравецкай АЭС.

- паскорыць працэс сінхранізацыі электрасетак краін Балтыі з кантынентальнай Еўропай да 2025 года, каб знізіць залежнасць краін Балтыі ад расейскіх крыніц энэргіі.

З поўным тэкстам петыцыі можна азнаёміцца па спасылцы.

Акрамя петыцыі, дэлегаты першага з'езда Руху супраць Астравецкай АЭС зацвердзілі тэкст ліста Аляксандру Лукашэнку. «Мы прапануем вам не садзейнічаць запуску 1-га блока гэтай атамнай станцыі, ігнаруючы міжнародныя патрабаванні бяспекі і наша добрасуседства; мы прапануем разгледзець пытанне што да АЭС на мясцовым узроўні двухбаковага кантэксту стасункаў Беларусь-Літва і Беларусь-Еўрапейскі Звяз», - гаворыцца ў лісце.

Напісаць каментар 12

Таксама сачыце за акаўнтамі Charter97.org у сацыяльных сетках