Лівійскі ўрад нацзгоды выйшаў з мірных перамоваў
- 19.02.2020, 10:02
- 6,269
Нагодай стаў абстрэл порта Трыпалі з боку арміі Халіфы Хафтара.
Лівійскі Урад нацыянальнай згоды Фаіза Сараджа абвесціў пра спыненне ўдзелу ў працы ваеннага камітэта ў Жэневе, які запрацаваў у канцы студзеня пад эгідай ААН. Нагодай стаў абстрэл порта Трыпалі з боку Лівійскай нацыянальнай арміі Халіфы Хафтара, паведамляе «Новая газета».
Ваенны камітэт Лівіі ўключае ў сябе пяць прадстаўнікоў ад абодвух бакоў канфлікту: першы раўнд перамоваў прайшоў 3–8 лютага, а другі пачаўся 18 лютага. У гэты ж дзень ЛНА нанесла некалькі ўдараў па порце Трыпалі: быў знішчаны турэцкі карабель. Прыхільнікі Хафтара заявілі, што там знаходзілася зброя, якая прыбыла праз парушэнне міжнароднага эмбарга, а самі яны выконваюць пагадненне аб спыненні агню.
#الجيش_الليبي يعلن استهداف سفينة شحن تركية كانت محملة بأسلحة في #ميناء_طرابلس#شاهد_سكاي pic.twitter.com/Gswwdpwqk1
— سكاي نيوز عربية (@skynewsarabia) February 18, 2020
Грамадзянская вайна ў Лівіі пачалася ў 2011 годзе пасля скідання Муамара Кадафі: пад кантролем Хафтара цяпер знаходзяцца ўсход і частка поўдня краіны, захад жа кантралюе ўрад нацыянальнай згоды ў Трыпалі, які быў створаны пад эгідай ААН.
УНС падтрымлівае і Турцыя: паводле інфармацыі СМІ, у Лівію ўжо прыбылі падраздзяленні турэцкага спецназа, ваенныя дарадцы і тэхніка. Там таксама знаходзяцца найміты з расейскай «ПВК Вагнера», якія выступаюць на баку ЛНА (паводле ацэнак турэцкіх вайскоўцаў, іх можа быць некалькі тысячаў чалавек).