Эрдаган запусціў зваротны адлік

Перамовы ў Маскве скончыліся няўдачай.

Прэзідэнт Турцыі Раджэп Таіп Эрдаган абвясціў сёння, 19 лютага, што ваенная аперацыя Турцыі ў Ідлібе непазбежная, і што ён прыняў канчатковую пастанову ў гэтым пытанні, адхіліўшы расейскую прапанову для ўрэгулявання канфлікту, піша Nedaa (пераклад - inosmi.ru).

Турэцкі лідар заявіў, што Турцыя не пакіне Ідліб сірыйскаму рэжыму, і яна поўная рашучасці ператварыць яго ў бяспечны раён і будзе дамагацца гэтага, нягледзячы на прадаўжэнне дыялогу з расейскім бокам.

Перамовы, якія адбыліся ўчора ў Маскве паміж турэцкай і расейскай дэлегацыямі, скончыліся няўдачай, бо Расея выступіла з прапановай абмежаваць прысутнасць Турцыі ў памежнай паласе працягласцю 16 кіламетраў на поўнач ад Ідліба.

Эрдаган падкрэсліў, што сірыйскі рэжым і ягоныя хаўруснікі (меў на ўвазе расейцаў) «яшчэ не ўсвядомілі рашучасці Турцыі». З ягоных слоў, Анкара зжыве ўсе захады, каб яе план у Ідлібе быў рэалізаваны. Прэзідэнт Турцыі дадаў: «Наша аперацыя ў Ідлібе - гэта толькі пытанне часу, а тое, што прапануюць нам сёння, - не адпавядае нашым патрабаванням».

Спецпрадстаўнік прэзідэнта Турцыі Ібрагім Калын (İbrahim Kalın) пацвердзіў учора, што Анкара катэгарычна адпрэчыла дарожныя карты і прапановы, зробленыя Расеяй, і што яна намагае на строгім захаванні пунктаў «сочынскага» пагаднення.

Эрдаган таксама падкрэсліў, што турэцкае войска «ператворыць Ідліб у бяспечны раён» і «поўнае рашучасці аднавіць бяспеку ў імя свайго народа і дзеля Турцыі...усякай цаной».

Прэзідэнт Турцыі скончыў сваю прамову апошнім папярэджаннем рэжыму Асада, сілы якога ўсё яшчэ прадаўжаюць атакі ў Ідлібе, заявіўшы: «Мы апошнім разам папярэджваем сірыйскі рэжым. Ён павінен зразумець, што мы настроеныя рашуча, і ў нас ужо ёсць план аперацыі ў Ідлібе».

Менш чым праз гадзіну пасля заяваў Эрдагана расейскае кіраўніцтва абвясціла аб намеры прадоўжыць кантакты з Анкарой, каб не дапусціць пагаршэння сітуацыі ў Ідлібе», падкрэсліўшы, што «правядзенне турэцкай ваеннай аперацыі супраць сірыйскага рэжыму з'яўляецца найгоршым сцэнарам».

Характэрна, што турэцкае войска прадаўжае рух у бок правінцыі Ідліб, каб папоўніць недахоп на яе цяперашніх франтах і падрыхтавацца да пачатку аперацыі. Яе падраздзяленні дыслакаваныя сёння ў цэнтры горада Атарыба на захад ад Алепа, а таксама стварылі новы ваенны пункт недалёка ад горада Махмалі на захадзе Ідліба.