У Беларусі могуць увесці пакаранне за абразу настаўніка
65- 19.02.2020, 18:53
- 22,408
Такую ідэю агучыла намесніца кіраўніка адміністрацыі Лукашэнкі.
- Апошнім часам адбываецца нямала падзей негатыўнага характару, калі вучні спрабуюць ціснуць на педагога, а часам і абражаюць яго. Грамадству неабходна стаць на абарону настаўніка, - кажа Вольга Чупрыс, намесніца кіраўніка адміністрацыі кіраўніка.
Вольга Чупрыс 19 лютага наведала Ваўкавыскі каледж, які належыць да Гарадзенскага ўніверсітэту ім. Я. Купалы і ў якім рыхтуюць у асноўным педагогаў.
Ідэю аб прававой абароне настаўнікаў Беларусь падгледзела ў Казахстане, сказала Чупрыс.
- Мы прыгледзеліся да гэтага досведу і таксама плануем увесці такую норму ў Кодэкс аб адміністрацыйных правапарушэннях, каб абараніць настаўніка. Бо гэта чалавек, з якім кожны з нас ідзе па жыцці і ад якога шмат у чым залежыць, як складзецца наш далейшы лёс, - цытуе намесніца кіраўніка адміністрацыі дыктатара БелТА.