Лукашэнка: Працуем на ўсю Паўночную Афрыку
37- 20.02.2020, 10:23
- 25,298
Такі падыход паказаў сваю «эфектыўнасць».
Беларусь і Егіпет пастанавілі рабіць стаўку на супольныя прадпрыемствы. Пра гэта Лукашэнка паведаміў журналістам пасля перамоваў у Каіры з прэзідэнтам Егіпта Абдэль Фатахам ас-Сісі, паведамляе БелТА.
Асноўную ўвагу на перамовах прэзідэнты надалі гандлёва-эканамічным сувязям.
Паводле словаў Лукашэнкі, супольныя напрацоўкі ёсць у прамысловай, ваенна-тэхнічнай, сельскагаспадарчай, навуковай, гуманітарнай галінах. У сферы прамысловай кааперацыі краіны пачыналі з праектаў стварэння ў Егіпце зборачных вытворчасцяў.
"Перакананы, што развіццё прамысловай кааперацыі цалкам адпавядае інтарэсам дзвюх дзяржаваў і дазваляе забяспечыць выхад на рынкі суседніх афрыканскіх краінаў, што для нас вельмі важна. Дай бог асвоіць стомільённы рынак Егіпта. З Каіра разам працуем практычна на ўсю Паўночную Афрыку і разглядаем варыянты далейшага супольнага прасоўвання па кантыненце", – адзначыў Лукашэнка.
"Мы робім стаўку на прасоўванне высокатэхналагічнай прадукцыі ў Егіпет з наступным стварэннем супольных прадпрыемстваў. Такі падыход ужо паказаў сваю эфектыўнасць", – падкрэсліў кіраўнік.
"Для Беларусі вялікую цікавасць мае ўдзел у маштабных праектах, ініцыяваных егіпецкім кіраўніцтвам, перш за ўсё ў стварэнні асаблівай эканамічнай зоны Суэцкага канала, арыентаванай на экспарт", – сказаў Лукашэнка.