Мясцовыя абаранілі астатнюю беларускамоўную школу Камянецкага раёна

Але спачываць на лаўрах рана.

Міністэрства адукацыі ўзяло на кантроль пытанне работы астатняй беларускамоўнай сярэдняй школы Камянецкага раёна. Пра гэта гаворыцца ў адказе міністэрства на калектыўны зварот жыхароў аграгарадка Амелянца ў абарону навучальнай установы, паведамляе tut.by.

У лісце за подпісам намесніка міністра Аляксандра Кадлубая паказана, што ў план аптымізацыі на 2020 год школа не ўключаная - гэта значыць, закрываць яе не плануюць. Але кропку ў гэтым пытанні ставіць рана.

Намеснік старшыні Камянецкага райвыканкама Дзяніс Шпак пацвердзіў, што далейшы лёс навучальнай установы ўсё яшчэ не вызначаны. Пастанова наконт школы павінна быць прынятая раённымі ўладамі да 1 красавіка.

- Школу ніхто не закрывае. Пытанне абмяркоўваецца, але працэдуру закрыцця ніхто не ініцыяваў, - паведаміў першы намеснік начальніка галоўнай управы адукацыі Берасцейскага аблвыканкама Аляксандр Жук.

Нагадаем, пра перспектыву расфармавання ў 2020 годзе Амелянецкай сярэдняй школы распавёў дырэктар на сходзе ў кастрычніку мінулага года. Такую пастанову падтрымалі далёка не ўсе настаўнікі, бацькі і вучні.

Выкладчык Амелянецкай СШ Павел Кендысь размясціў у інтэрнэце петыцыю з патрабаваннем не дапусціць закрыцця навучальнай установы - і папрасіў чыноўнікаў растлумачыць, чаму за 30 гадоў у раённым бюджэце не знайшлося сродкаў на будаўніцтва ў Амелянецкай школе спартзалы ці хаця б прыбіральні.

30 студзеня навучальную ўстанову наведаў памочнік прэзідэнта Берасцейскай вобласці Анатоль Маркевіч. Ён агледзеў кабінеты, пагаварыў з выкладчыкамі і вучнямі.

- З наскоку такія пытанні не развязваюцца. Трэба ўзважыць усе плюсы, усе мінусы, пачуць меркаванне бацькоў, настаўнікаў, адміністрацыі школы, як дзеці настроены, і толькі пасля гэтага прымаць пастанову. Трэба разабрацца ў дэталях і знайсці рацыянальнае і разумнае. Думаю, што паспешлівая пастанова аб аптымізацыі [Амелянецкай школы] наўрад ці будзе прынятая найбліжэйшым часам, - паведаміў Анатоль Маркевіч.