Беларусь - краіна высокіх, але недалёкіх тэхналогій

Новаўвядзенні ад «Мінсктрансу» сталі сапраўдным мемам.

Беларусы «вайбер», беларусы «варгеймінг», беларусы «фло», беларусы «маскарад», беларусы «эпам», беларусы супер-пупер і ў тэхналогіях наперадзе ўсёй астатняй планеты. Першая ў свеце крыптадзяржава. Беларусь - краіна, у якой словы «ІТ-спецыяліст» і «сын мамінай сяброўкі» - сінонімы. І разам з тым у Беларусі высокія тэхналогіі часцяком выяўляюцца нейкімі недалёкімі, піша The Village Беларусь.

Свежы, але вельмі паказальны прыклад, звязаны са сталічным аператарам грамадскага транспарту «Мінсктранс». Яшчэ з 2017 года праезд у метро можна аплаціць бескантактавай банкаўскай карткай; у чэрвені 2018 года тэхналогію ўкаранілі на турнікетах усіх станцый; пазней падключылася і Беларуская чыгунка - «пластыкам» можна аплаціць праезд у «гарадскіх электрычках». І тых, і іншых сістэма задавальняе. У наземным транспарце - менавіта ім кіруе «Мінсктранс» - сістэму ў тэставым рэжыме запусцілі ў траўні 2019-га, пакуль толькі на трамваях 6-га маршруту. Казалі, што вось-вось гэта здарыцца і наогул ва ўсіх гарадскіх аўтобусах, тралейбусах і трамваях.

Але потым «Мінсктранс» прытрымаў «коней»: распавёў, што сістэма працуе дрэнна. Маўляў, прапанаваная БПС-Банкам сістэма не дазваляе кантраляваць, а колькі ж пасажыраў аплацілі праезд банкаўскай карткай, і нібыта грошы губляліся і не даходзілі да аператара. І ў пачатку лютага паведаміў, што аплату праезду карткай скасуюць зусім. Банк адказаў на прэтэнзіі і заявіў, што ніводнага выпадку страты грошай не было зафіксавана. Але «Мінсктранс» не стаў апраўдвацца, а замест гэтага прыдумаў новы ход: блакаваць кампосцеры і валідатары ў транспарце, як толькі аўтобус адыдзе ад прыпынку, - гэтую навіну празвалі «правілам 15 секунд». Падняўся вялікі шум, беларусы запатрабавалі адправіць кіраўніцтва «Мінсктранса» ў адстаўку. «Мінсктранс» у адстаўку не сышоў, але скасаваў «правіла 15 секунд» і нават сказаў, што нічога такога і не думаў рабіць, а проста рабіў маніторынг грамадскай думкі пасажыраў.

Тым часам у некалькіх гарадах краіны запусцілі яшчэ некалькі сістэм аплаты праезду з дапамогай мабільніка і QR-кодаў, а ў «Мінсктрансе» для кантралёраў павялічылі працоўны дзень: цяпер тыя ловяць зайцоў з 6-й раніцы да поўначы. І замест таго, каб вярнуцца да пытання аплаты праезду з дапамогай банкаўскай карты ці мабільніка, або пайсці шляхам сусветнага прагрэсу і дазволіць «закідваць» на электронны праязны не разавыя паездкі, а проста грошы, на «Мінсктрансе» асвойваюць новы няпрофільны тып дзейнасці і пачынаюць выпускаць ролікавыя лыжы - такія вельмі любіць Аляксандр Лукашэнка. Усё ж брускі з алюмінію - гэта не вам не банкаўскія транзакцыі, тут думаць трэба.