25 траўня 2020, панядзелак, 1:46
Сім сім, Хартыя 97!
Рубрыкі

Беларускія дызайнеры пачалі адмаўляцца ад майстэрняў

8
Беларускія дызайнеры пачалі адмаўляцца ад майстэрняў
ФОТА: РАДЫЁ «СВАБОДА»

Што выйграе ЖРЭА і ў канчатковым выніку дзяржава?

Наступіла развязка ў канфлікце паміж Камітэтам дзяржкантролю і беларускімі дызайнерамі з нагоды творчых майстэрняў, якія падаваліся на ільготных умовах. Спачатку кантралёры палічылі, што дызайнеры і мастакі парушаюць умовы - і ЖРЭА налічылі ім велізарныя сумы арэнды. Пасля таго, як пра гэта напісалі СМІ, у КДК і Мінкульце паабяцалі разабрацца. У выніку дызайнер Максім Карась атрымаў пастанову ЖРЭА Маскоўскага раёна - заплаціць штраф за не мэтавае выкарыстанне памяшкання, у выніку ён адмовіўся ад майстэрні, паведамляе tut.by.

- У нейкiм кейсе з майстэрнямі нашы надзеі не цалкам апраўдаліся, - паведамляюць у Беларускім саюзе дызайнераў. - Нягледзячы на пазітыўны адказ КДК на запыт Міністэрства культуры аб адклiканнi актаў на аплату штрафных санкцый і недапушчэнні ўжывання арэнднай платы без льготы і прымянення якіх-небудзь мер адказнасці, ЖРЭА Маскоўскага раёна вынесла свой уласны вердыкт, палічыўшы педагагічную дзейнасць Максіма Карася камерцыйнай. Карась як ІП навучае калегаў-дызайнераў і проста ахвочых здабыць навыкі ў праектаванні і вырабу скургалантарэйных вырабаў, перадае свае прафесійныя і творчыя навыкі. Нягледзячы на нашы спробы пераканаць ЖРЭА, што гэта таксама творчая дзейнасць (што ўказана і ў нашым Палажэнні аб майстэрнях, і ў Кодэксе аб культуры), ЖРЭА Маскоўскага раёна, хоць і адклікаў абсурдны рахунак у 98 тысяч рублёў, усё-такі запатрабавала заплаціць штраф у 780 рублёў за нібыта нямэтавае выкарыстанне.

У выніку дызайнер наважыў адмовіцца ад арэнды майстэрні. Такое ж рашэнне прыняла калега Максіма, Юлія Цішкевіч, майстэрня якой знаходзілася па суседстве, хоць да яе з боку арандатара прэтэнзій не было.

- Што выйграе ЖРЭА і ў канчатковым выніку дзяржава? - задаюцца пытаннем дызайнеры. - Ці знойдуць яны арандатараў, гатовых укладаць грошы ў гэтае памяшканне? Пры прызначэнні штрафу ЖРЭА спасылалася на нейкія вусныя распараджэнні КДК, але на афіцыйныя пісьмовыя рэкамендацыі ЖРЭА рэагаваць не захацела. Няхай жыве ЖРЭА Маскоўскага раёна, самае незалежнае і прынцыповае ў свеце.

У той жа час, прэтэнзіі што да астатніх майстэрняў былі ануляваныя, паведамілі ў Саюзе.

- Цяпер усім творчым саюзам трэба будзе сумесна працаваць з Мінкультам для ўнясення ў Кодэкс аб культуры разгорнутага палажэння аб творчых майстэрнях, дзе будзе дакладна прапісанае, што там павінна быць, а чаго не павінна, што можа, а чаго не можа творчы работнік у гэтай майстэрні рабіць: тварыць, навучаць, запрашаць гасцей, памочнікаў, заказчыкаў, круціць швейную машынку (і іншыя машынкі, адпаведна профілю), трымаць ложак, і якім законным чынам атрымліваць даходы ад сваёй творчай дзейнасці. Спадзяёмся, што пасля гэтых правак падобныя прававыя калізіі больш не паўстануць, і прадстаўнікі ЖРЭА перастануць наступаць на крылы творцам. Магчыма, паўстане пытанне і аб наданні асаблівага грамадзянска-прававога статусу для творчых работнiкаў па аналогіі з рамеснікамі, адвакатамі, натарыусамі.

Нагадаем, Камітэт дзяржкантролю правёў маніторынг творчых майстэрняў беларускіх мастакоў, у якіх льготная стаўка на арэнду. Кантралёры палічылі, што не ўсе мастакі выконваюць правілы, таму некаторым пералічылі арэнду і выставілі рахунак да 50 тысяч даляраў. Умяшаўся старшыня КДК: Леанід Анфімаў асабіста пабываў у майстэрні Уладзіміра Цэслера, дзе рэвізораў не задаволіў ложак, і рашэнне пра пералік скасавалі. Міністэрства культуры звярнулася ў Дзяржкантроль і Менгарвыканкам з просьбай растлумачыць творчым работнікам, у чым жа заключаюцца парушэнні, і не касаваць у аднабаковым парадку дамовы аб арэндзе.