Новы від «лістоў шчасця»

На ўзбраенні ў ДАІ з'явілася адмысловая прылада.

«Лісты шчасця» цяпер будуць атрымліваць і кіроўцы, якія парушаюць правілы паркоўкі. АДАІ Барысаўскага РУУС пачала выкарыстоўваць адмысловую прыладу «Паркрайт», якая дапамагае фіксаваць правапарушэнні ў аўтаматычным рэжыме.

Прыбор прызначаны для счытвання і ідэнтыфікацыі рэгістрацыйных знакаў аўтамабіляў і выяўлення парушэнняў у аўтаматычным рэжыме. У яго ўнесены звесткі па месцах, у якіх прыпынак/стаянка забароненыя, паведамляе ex-press.by.

Прыбор мацуецца ў салоне службовай машыны на лабавое шкло і адсочвае парушэнні паркоўкі па баках. У яго памяць унесеныя самыя праблемныя ўчасткі Барысава.

Адна з самых праблемных вуліц - Чапаева. Тут размешчаны фізкультурна-аздараўленчы цэнтр і завод «Аўтагідраўзмацняльнік». Ёсць стаянкі. Але яны перапоўненыя, і свабодных месцаў практычна няма. Ды і навошта вышукваць вольнае месца, калі можна проста пакінуць свой «універсал» або «седан» на праезнай частцы? І нічога, што ён перашкаджае аўтобусам і іншым удзельнікам дарожнага руху. «Гэта ж не трамваі - аб'едуць» - мабыць, такой логікай кіруюцца тыя, хто смела паркуецца прама пад знакам «Стаянка забароненая».

«Убачыўшы» знаёмую вуліцу, «Паркрайт» аўтаматычна актывуецца і пачынае здымаць аўто, прыпаркаваныя не згодна з правіламі. Усе, хто не паспеў пакінуць незаконную стаянку, трапілі ў базу і неўзабаве атрымаюць «лісты шчасця».

- Прыбор працуе праз GPS і фіксуе ўсё ў рэжыме рэальнага часу. Каб зарэгістраваць парушэнне, дастаткова праехаць блізу машын. У «Паркрайта» дзве камеры. Адна дае агульную карцінку, другая набліжае рэгістрацыйны нумар. Далей нумары аўтамабіляў заносяцца ў базу звестак, а пасля ўладальнікі машын атрымліваюць паведамленне пра тое, што яны здзейснілі парушэнне і павінны аплаціць штраф, - распавёў начальнік АДАІ Барысаўскага РУУС Яўген Ільюшонак.

З пачатку гэтага года на тэрыторыі Барысаўскага раёна адбылося сем ДТЗ з удзелам пешаходаў, у якіх два чалавекі загінулі.

- У Барысаве таксама з'яўляецца актуальнай праблемай паркоўка паблізу пешаходных пераходаў. З дапамогай прыбора «паркрайт» мы працуем на выяўленне кіроўцаў, якія парушаюць правілы дарожнага руху, а менавіта паркуюць транспартны сродак паблізу пешаходных пераходаў бліжэй за 15 метраў, - распавёў Яўген Ільюшонак. - Кожны дзень нарады ДПС ДАІ будуць выяўляць такіх кіроўцаў.