Экспертка: Крывяноснай сістэмай любой дыктатуры з'яўляецца карупцыя

Чаму ў эстонцаў пенсія амаль у тры разы вышэйшая, чым у беларусаў.

Экспертка аналітычнага цэнтра "Стратэгія" Вікторыя Васілевіч тлумачыць розніцу паміж пенсіямі ў Эстоніі (528 еўраў з 1 сакавіка) і Беларусі (181,5 еўра ў эквіваленце, паводле афіцыйнай статыстыкі). Пра гэта піша gazetaby.com.

– Эстонцы развіваюць сваю дзяржаву, яны прывабліваюць у сваю краіну рэальныя інвестыцыі, – каментуе Вікторыя Васілевіч. – Эстонцы абсалютна выразна ўсведамляюць вымыванне моладзі з сваёй краіны і таму спрабуюць ствараць усе ўмовы для таго, каб бізнэс развіваўся.

Экспертка дадала, што менавіта Эстонія стала першай краінай у Еўропе, дзе быў створаны электронны ўрад.

– Усё, акрамя рэгістрацыі шлюбаў і афармлення нерухомасці, можна зрабіць у электронным выглядзе. Простасць адкрыцця бізнэсу, працы, нязменнасць умоваў вядзення бізнэсу, магчымасці атрымання еўрапейскай адукацыі на тэрыторыі Эстоніі або з выездам з краіны.

Паводле словаў Вікторыі Васілевіч, высокая зацікаўленасць эстонскага ўрада ў тым, каб насельніцтва не пакідала краіну, выяўляецца і ў разнастайных праграмах фінансавання дадатковай адукацыі, павышэння кваліфікацыі і г.д.

– Яны прывабліваюць нашу моладзь вучыцца, укладваюць у гэтую адукацыю грошы. Стыпендыя для беларускіх студэнтаў складае ад 500 еўраў.

Вікторыя Васілевіч адзначыла, што дзяржава дзейнічае як механізм, змазвальнай сістэмай якога з'яўляецца заканадаўства.

– Каб адказаць на пытанне, хто мы, хто стаіць на месцы, корпаецца і не глядзіць па баках, то мы ўбачым, што насуперак дзейнаму заканадаўству і думцы большасці насельніцтва паўсюдна ўсталёўваюцца шапікі, якія будуць прадаваць атруту ў выглядзе цыгарэтаў.

Мы бачым, што бюджэтнікам, нягледзячы на ўсе абяцанні, парэзалі заробкі, і цяпер, каб захаваць твар пры дрэннай гульні, заяўлена, што няправільна зроблены разлік.

Дык вось, адказваючы на пытанне, чаму ж мы не вучымся. Хто ж будзе вучыцца? Тыя, хто зусім ігнаруе дзейнае заканадаўства? Тыя, хто пляваць хацелі на меркаванне насельніцтва? Дык а для чаго ім развіваць эканоміку краіны? Яны і так добра жывуць.

Аналітык цэнтра "Стратэгія" нагадала, што крывяноснай сістэмай любой дыктатуры з'яўляецца карупцыя.

– Пры наяўнасці карупцыі вельмі важна, каб грамадства было засунутае ў далёкі кут, каб яно было неадукаваным і не магло выкарыстоўваць нават лапікі дзейнага заканадаўства для абароны ўласных інтарэсаў.