Палітычнае напружанне ў Албаніі: прэзідэнт падаў у суд на міністра юстыцыі

Ілір Мета абвінавачвае міністра юстыцыі і яшчэ двух чыноўнікаў у парушэнні Канстытуцыі.

Прэзідэнт Албаніі ў панядзелак падаў у суд на міністра юстыцыі і яшчэ двух чыноўнікаў, якіх ён абвінавачвае ў парушэнні Канстытуцыі.

Пра гэта паведамляе «Европейская правда» са спасылкай на агенцтва Associated Press.

Ілір Мета абвінаваціў іх у «выкраданні» паўнамоцтваў, якія прэзідэнту дае Канстытуцыя. Ён сказаў, што патрабуе ў спецыяльнага пракурора разгледзець гэтую справу.

У цэнтры пазову - сітуацыя з Канстытуцыйным судом Албаніі, у якім цяпер вакантныя 6 з 9 месцаў. Адкліканыя суддзі не здолелі давесці, што ўся іх маёмасць была набытая законным шляхам і што іх кар'ера адказвала антыкарупцыйным нормам і прафесійным стандартам. Запаўненне вакантных месцаў ператварылася ў жорсткія спрэчкі сярод палітычных партый.

Палітычная нестабільнасць у Албаніі адбываецца ў той час, як краіна праводзіць рэформы ў надзеі атрымаць «зялёнае святло» для пачатку перамоў што да сяброўства ў ЕЗ.

Мета заклікаў 2 сакавіка правесці вялікі антыўрадавы пратэст і яго крок падтрымала апазіцыя.

На працягу некалькіх месяцаў мінулага года апазіцыя рэгулярна праводзіла акцыі пратэсту, якія часта ператвараліся ў жорсткія сутыкненні з паліцыяй. Апазіцыя таксама байкатавала парламент і мясцовыя выбары, абвінавачваючы ўрад у падтасоўцы галасоў і ў сувязях з арганізаванай злачыннасцю.

З моманту ўступлення на пасаду тры гады таму і дагэтуль Мета заўсёды быў актыўным праціўнікам кіруючай Сацыялістычнай партыі прэм'ер-міністра Эдзі Рамы.

Сацыялісты, якія дамінуюць у парламенце, пачалі працэдуру імпічменту супраць Меты, якая стала першай у гісторыі посткамуністычнай Албаніі.

Чакаецца, што ў сакавіку парламент падасць справаздачу, у якой, імаверна, будзе ўтрымлівацца просьба аб адстаўцы прэзідэнта.