Стаўкі ў валютных дэпазітах беларусаў упалі ў два разы

Прыйшоў час забіраць даляры з банкаў?

Сярэдняя стаўка ў новых кароткатэрміновых дэпазітах фізічных асобаў у замежнай валюце ў студзені гэтага года знізілася да 0,33% з 0,35% у снежні і 0,76% у студзені мінулага года, піша select.by.

У той самы час, сярэдняя стаўка ў новых валютных укладах на тэрмін большы за 1 год апусцілася да 1,16% з 1,4% і 2,23% адпаведна. Такім чынам, за год гэты параметр знізіўся прыкладна ў 2 разы.

Знізіліся ў студзені і адсоткі ў валютных дэпазітах юрыдычных асобаў, але не так значна. А менавіта, сярэдняя стаўка ў новых укладах прадпрыемстваў на тэрмін большы за год у студзені сёлета апусцілася да 1,06% з 1,61% у студзені летась. Але ў снежні летась гэтая стаўка была яшчэ ніжэйшай: 0,48%. Гэта можна растлумачыць выпадковым адхіленнем.

Сярэдняя стаўка ў новых кароткатэрміновых валютных дэпазітах прадпрыемстваў у студзені сёлета апусцілася да 0,82% гадавых з 0,95% у снежні і 0,98% у студзені 2019 года.

На фоне банкаўскіх дэпазітаў адсоткі ў валютных аблігацыях Міністэрства фінансаў РБ здаюцца вельмі прывабнымі, хоць значнага попыту на іх няма. 13 лютага Мінфін правёў аўкцыён для размяшчэння аблігацый 266-га года, намінаваных у далярах ЗША, на якім размесціў толькі прыкладна трэцюю частку ўсяго аб'ёму эмісіі.

Тэрмін звароту аблігацый складае 2 920 дзён. Да аўкцыёну было дапушчана 19 заявак ад фізічных і юрыдычных асобаў са стаўкамі ад 3,7% да 5,5% гадавых на агульную суму 46,3 млн даляраў. Але Мінфін задаволіў толькі 4 заяўкі на суму 20,63 млн даляраў. Стаўку ў гэтых аблігацыях Мінфін вызначыў роўнай 3,9% гадавых. Неразмешчанымі засталіся аблігацыі на 39,375 млн даляраў. Яны будуць прадавацца з 20 лютага на Беларускай валютна-фондавай біржы без аўкцыёну.

Сітуацыя з адсоткамі ў новых валютных крэдытах банкаў з'яўляецца больш складанай, чым у дэпазітах. Сярэдняя стаўка ў новых крэдытах на тэрмін да 1 года ў студзені гэтага года знізілася ўсяго да 4,15% з 4,2% у снежні і 4,28% у студзені 2019 года. Гэта значыць, яе памяншэнне было чыста сімвалічным.

Аднак сярэдняя стаўка ў новых валютных крэдытах на тэрмін большы за год знізілася нашмат больш істотна: да 3,89% гадавых з 4,23% і 6,05% адпаведна.