Экс-прэзідэнт Арменіі Саргсян паўстаў перад судом
5- 26.02.2020, 10:36
- 8,601
Яго вінавацяць у арганізацыі карупцыйнай схемы.
Ерэванскі суд агульнай юрысдыкцыі ў адміністрацыйных раёнах Аван і Нор Норк разглядае справу трэцяга прэзідэнта Арменіі Сержа Саргсяна, уладальніка кампаніі «Флэш» Барсега Бегларана, былога міністра сельскай гаспадаркі Серго Карапецяна, былога намесніка кіраўніка Мінсельгаса Самвела Галсцяна і экс-кіраўніка Управы раслінаводства той жа ўстановы Геворка Аруцюняна, паведамляюць «Навіны Арменіі».
Саргсян, які займаў пасаду прэзідэнта Арменіі два тэрміны запар з 2008 года, падаў у адстаўку ў 2018 годзе, калі ягоны план застацца ва ўладзе ў якасці прэм'ер-міністра справакаваў масавыя пратэсты, лідарам якіх стаў былы журналіст Нікол Пашынян, які пасля заняў пасаду прэм'ера.
«Уся гэтая справа сфабрыкаваная, каб не даць Сержу Саргсяну займацца актыўнай палітыкай», – заявіў карэспандэнту агенцтва «Франс Прэс» ягоны адвакат Амрам Макінян.
У аўторак суд абмеркаваў працэдурныя пытанні. Слуханне справы ў сутнасці пачнецца праз некалькі тыдняў ці месяцаў.
У снежні мінулага года Саргсян быў абвінавачаны ў арганізацыі карупцыйнай схемы, якая нібыта спрыяла ўзбагачэнню чыноўнікаў. Яму было забаронена пакідаць Арменію. У выпадку прызнання віны былы прэзідэнт, якому цяпер 65 гадоў, можа страціць свабоду на тэрмін да васьмі гадоў.