Валерый Бычкоўскі: Паліўныя пратэсты будуць набіраць абароты

Людзі абсалютна маюць рацыю ў тым, што пачалі бунтаваць.

Актывіст грамадзянскай кампаніі «Еўрапейская Беларусь» Валер Бычкоўскі, які працуе ў службе таксі, распавёў прэс-службе «Еўрапейскай Беларусі», чым можа абярнуцца рэгулярнае падаражэнне паліва.

- Як вы ставіцеся да таго, што кожны тыдзень падвышаецца кошт бензіну?

- Вядома, вельмі адмоўна. Я мяркую, што ўлады нажываюцца на простых людзях.

Быццам бы здаецца, што па капейцы, па капейцы - непрыкметна, але паколькі я працую кіроўцам таксі, я ўвесь час і шмат запраўляюся. Раней на 20-30 рублёў, цяпер гэтага няма. І гэта ўсяго за год-паўтара. Розніца адчувальная. Тады яшчэ паліва каштавала паўтара рубля, а цяпер, амаль два. Арыфметыка несуцяшальная.

- Чаму гэта адбываецца?

- Вінавата кіраўніцтва нашай дзяржавы, бо эканоміка на самым дне, усё каціцца ў прорву. Дзяржаве няма адкуль браць грошы, таму яна абдзірае простых людзей. З замежнымі пастаўкамі ў Лукашэнкі таксама не складаецца. Каго рабаваць, як не сваіх?

- Учора адбылася акцыя ля офіса «Белнафтахіма». Як вы ставіцеся да таго, што людзі пачалі пратэставаць?

- Я мяркую, што людзі правільна робяць, што пачалі выходзіць на пратэсты. І хацелася б верыць, што гэтыя пратэсты пачнуць набіраць абароты. І тут вельмі важная інфармацыйная падтрымка, бо я, напрыклад, не ведаў, што будзе акцыя, а так бы абавязкова ўзяў удзел у ёй. Трэба, каб была інфармацыя ў інтэрнэце, у сацсетках, заклікі.