2 красавiка 2020, Чацвер, 0:15
Народны карантын
Рубрыкі

Халодны душ для Лукашэнкі

36
Халодны душ для Лукашэнкі
ВАЛЕРИЙ КАРБАЛЕВИЧ

Радасць выявілася заўчаснай.

21 лютага, падчас сустрэчы з губернатарам Архангельскай вобласці Ігарам Арловым, Аляксандр Лукашэнка з непрыхаванай радасцю паведаміў, што яму кагадзе затэлефанаваў Уладзімір Пуцін. Таму, маўляў, давялося крыху затрымацца.

Сэнс паслання прэзідэнта Расеі, паводле версіі А. Лукашэнка, у тым, што РФ выказала ахвоту кампенсаваць страты «ад памяншэння мыты ў 2020 годзе». Кажучы па-іншаму, Масква ахвочая кампенсаваць страты Беларусі ад расейскага падатковага манеўру.

Менавіта гэтага дамагаўся Менск ад Крамля ў апошнія гады. Але ўсё было марна. І вось, калі меркаваць са слоў А. Лукашэнкі, нарэшце У.Пуцін здаўся на ласку пераможцы. А. Лукашэнка назваў нават лічбу кампенсацыі - $ 300 млн.

Але на гэтым А. Лукашэнка не спыніўся і тут жа наважыў падняць стаўкі. Як вядома, апетыт прыходзіць падчас ядзення. Мабыць, ён разважыў, што трэба касіць, пакуль раса, і трэба даціснуць зрынутага супраціўніка.

У той жа дзень, крыху пазней, прымаючы амбасадара Беларусі ў Расеі Уладзіміра Сямашку, А. Лукашэнка ўжо назваў новую лічбу - $ 420-430 млн і дадаў: "Пуцін прапанаваў, што гэтыя грошы яны Беларусі кампенсуюць. Ён прызнаў, што гэта справядліва". Такім чынам, рубон, мы ціснем, гнуцца маскавіты.

Прычым, з гэтай інфармацыі вынікае, што кампенсацыя мае адбыцца не з бюджэту РФ, а за кошт грошай расейскіх нафтавых кампаній.

Радасць ад перамогі выявілася кароткачасовай, дакладней, заўчаснай.

Даслоўна праз некалькі гадзін Масква пачала сваё спраўджванне фактаў. Прэс-сакратар прэзідэнта Расеі Дзмітрый Пяскоў пацвердзіў інфармацыю аб тэлефанаванні Пуціна і пра ахвоту расейскай стараны ісці на фінансавыя саступкі. Але наконт канкрэтнай сумы кампенсацыі ён дыпламатычна заўважыў, што "кожная старана робіць свае ўласныя калькуляцыі".

А сапраўдным халодным душам для афіцыйнага Менска стала заява міністра энергетыкі РФ Аляксандра Новака, якая прагучала ў той жа дзень.

Высветлілася, што, як зазвычай адбываецца ў беларуска-расейскіх стасунках, А.Лукашэнка і У.Пуцін па-рознаму зразумелі, пра што яны дамовіліся. Выявілася, што ўсё зусім не так, і здарылася прыкрае непаразуменне.

Паводле інфармацыі міністра, па-першае, гаворка ідзе не аб кампенсацыі за страты, а ўсяго толькі пра зніжку. Па-другое, Масква пагадзілася на зніжэнне прэміі экспарцёраў толькі на 2 (два!) даляры за тону штогод прапарцыйна зніжэнню экспартнай мыты.

Калі грунтавацца на тым, што Беларусь, як планавалася на 2020 год, імпартуе 24 млн тон расейскай нафты, то гадавы бонус складзе...$ 48 млн. Розніца з той сумай, пра якую заявіў А.Лукашэнка, амаль у дзесяць разоў! Ды і гэтая лічба, мяркуючы з усяго, завышаная. Бо цяжка разлічваць на гадавы аб'ём 24 млн тон, бо ўжо два месяцы нафта паступае ў мінімальнай колькасці.

Магчыма, Пуцін казаў пра суму расейскіх зніжак за пяць гадоў. Толькі ў гэтым выпадку яна набліжаецца да абвешчаных А.Лукашэнкам лічбаў.

Цікава, што беларускія дзяржаўныя СМІ не пачулі пярэчання з Масквы і далей абвяшчаюць версію А.Лукашэнкі, тлумачачы гэта як перамогу Беларусі над РФ у бітве за нафту.

У кожным выпадку, канчатковая яснасць надыдзе толькі пасля падпісання кантрактаў з нафтавымі кампаніямі. Тады стане ясна, ці пагадзіўся Менск з такімі ўмовамі, ці скончылася нафтавая вайна.

Але нават калі грунтавацца на версіі, выкладзенай расейскай стараной, то відавочна, што Масква пайшла на саступкі, хай і невялікія. Бо дагэтуль цэлыя два месяцы яе пазіцыя была жалезабетонная, нафтавыя кампаніі не хацелі саступаць ні даляра, намагалі прэміі. А Крэмль катэгарычна адмаўляўся ціснуць на іх.

Намеснік кіраўніка Адміністрацыі прэзідэнта Расеі Дзмітрый Козак увесь час казаў, што мы не будзем мяшацца ў працэс узгаднення цаны, гэта камерцыйнае пытанне. Цяпер жа У.Пуцін абвясціў, што ахвочы ісці хай і на сімвалічныя саступкі, г.зн. прапанаваў кампраміс.

Чым патлумачыць такі паварот у пазіцыі Масквы? Відавочна, што гэтая пастанова Крамля неяк звязаная з візітам у Беларусь кіраўніка кампаніі «Роснефть» Ігара Сечына.

Валерый Карбалевіч, «Свободные новости»