Навальны знайшоў нью-ёркскія кватэры сям'і Мішусціна

Іх набыццё звязанае са справай Магніцкага.

Фонд барацьбы з карупцыяй расейскага апазіцыйнага палітыка Аляксея Навальнага выявіў у Нью-Ёрку пяць кватэр, набытых зяцем прэм'ер-міністра РФ Міхаіла Мішусціна.

Пра гэта паведамляе сайт navalny.com:

«Гэта дом у Нью-Ёрку.

Пяць кватэр у ім набыў зяць цяперашняга прэм'ер-міністра Мішусціна.

І паслядоўнасць падзей выглядае так:

1. Некалькі соцень мільёнаў даляраў выкрадаюцца праз Федэральную падатковую службу РФ (паводле схемы вяртання фіктыўнага ПДВ - «справа Магніцкага»)

2. Крадзеж даведзены цалкам, у дзясятцы краін распачатыя крымінальныя справы (але не ў Расеі, вядома ж). Частка гэтых выкрадзеных грошай дастаецца Дзянісу Кацыву, які неадкладна набывае на іх некалькі кватэр у Нью-Ёрку

3. Праз 3 тыдні зяць кіраўніка падатковай службы Расейскай Федэрацыі набывае 5 кватэр у гэтым жа доме ў Нью-Ёрку. Гэта значыць, кватэры юрыдычна напалову належаць ягонай жонцы, сястры Мішусціна.

4. Гэты зяць (Удодаў) шматкроць згадваўся ў СМІ (і пазней фігураваў у крымінальнай справе) як арганізатар ашуканскіх схем у вяртанні ПДВ.

Вялікае прывітанне ўсім, хто пісаў паведамленні пра новага эфектыўнага прэм'ер-міністра Мішусціна. Тэхнакрата, які шмат чаго дамогся ў падатковай».

Прадстаўляем вам новы звышцікавы эпізод біяграфіі зяця Мішусціна, раней нікому не вядомы. Удодаў, як мы высветлілі, неўзабаве пасля вяселля з сястрой Мішусціна, набыў 6 кватэр у выдатным новым жылым комплексе на 20 Pine Street ў Нью-Ёрку. У трохстах метрах ад знакамітай Уол Стрыт.

Ніякай канспіралогіі. Ніхто нам гэта не «зліў» і не «паведаміў». Уся інфармацыя даступная ў Нью-Ёркскім рэестры нерухомасці. Можаце правяраць.

5 кватэр былі набытыя 23 снежня 2009 года. Яны набытыя не наўпрост Удодавым як фізічнай асобай, а праз 5 фірмаў. Гэта значыць, яны былі першапачаткова аформленыя на фірмы з падобнымі назвамі (PINE 2315, PINE 2401, PINE 2407), а Удодаў ужо набыў гэтыя фірмы разам з кватэрамі.

Пры ўважлівым вывучэнні дакументацыі ў нью-ёркскім рэестры мы бачым ягонае прозвішча ў дакуменце на пажарную сігналізацыю:

А вось дакумент іпатэкі, дзе адназначна паказана, што Удодаў з'яўляецца адзіным уладальнікам фірмаў, якім належаць кватэры:

Паказаны кошт пяці кватэр 5,1 млн даляраў. Удодаў перааформіў на сябе іпатэку на суму 1,9 млн даляраў і накіроўваў у банк аплаты ад здачы кватэр у арэнду.

Вось так выглядае адна з гэтых кватэр, якая належала Удодаву, і яе здавалі:

Улетку 2010-га зяць Мішусціна Удодаў набывае шостую кватэру ў гэтым жа доме. Паводле такой жа схемы, праз юрыдычную асобу. Кошт 1,3 млн даляраў.

Цяпер мы ведаем, што Удодаў і сястра Мішусціна - муж і жонкаі гэтую маёмасць можам смела ўважаць за сумесна нажытую. То бок, гэта не «кватэры Удодава», а «кватэры сястры кіраўніка падатковай службы і яе мужа». Кватэры, дарэчы, да 2018-га года ўсе прадалі. Вельмі спадзяемся, што сям'я чыноўніка не забылася паказаць гэты даход у сваіх падатковых дэкларацыях.

Але наша гісторыя не пра 6,4 мільёна даляраў, выдаткаваных на амерыканскую нерухомасць. Наша гісторыя зусім пра іншае.

Калі вы крыху пашукаеце адрас удодаўскіх нью-ёркскіх кватэр (20 Pine Street), то выявіце, што пра гэты жылы комплекс ужо шмат пісалі ў СМІ. І не паверыце, у сувязі з Расеяй.

Я спадзяюся, вы ўсе добра памятаеце справу Магніцкага. Юрыст Сяргей Магніцкі выкрыў схему, паводле якой жулікі незаконна кампенсавалі ПДВ на 230 мільёнаў даляраў, вывелі іх з Расеі, а самога Магніцкага закатавалі і забілі ў турме.

Скрадзеныя грошы вывелі за мяжу і размеркавалі паміж кучай розных людзей. Кіраўнік падатковай, якая гэта ўсё пракруціла, набыў сабе кватэру ў Дубаі. Следчыя і паліцыянты атрымалі грошы і набылі сабе нерухомасць у Маскве. Ну а частка гэтых грошай была перапраўленая на рахункі фірмаў Дзяніса Кацыва, расейскага жуліка і сына былога віцэ-прэзідэнта РЧ.

На гэтыя самыя грошы, скрадзеныя паводле «схемы ПДВ», Кацыў набыў сабе нерухомасць у Нью-Ёрку. Амерыканскія ўлады гэтую нерухомасць у 2013-м годзе арыштавалі ў сувязі са справай аб адмыванні сродкаў паводле справы Магніцкага. Была распачатая крымінальная справа, у выніку якога Кацыў пайшоў на ўгоду і выплаціў у амерыканскі бюджэт 6 мільёнаў даляраў штрафу.

Пікантнасць сітуацыі ў тым, што арыштаваная нерухомасць Кацыва — гэта 5 кватэр з ужо знаёмым нам адрасам 20 Pine Street. У тым жа самым доме, што і 6 кватэр Удодава.

Вытрымка з матэрыялаў пракуратуры: Prevezon Holding (кампанія Кацыва) набывае нерухомасць на вуліцы 20 Pine street.

А дадатковы градус усёй гэтай гісторыі дадае тое, што Кацыў і Удодаў набылі свае кватэры з розніцай у 3 тыдні. Кацыў - 30 лістапада, а Удодаў - 23 снежня 2009 года.

Сітуацыя выглядае - горш не бывае. Я не ведаю, дзе Мішусцін павінен апублікаваць сваю наступную замову і як гэта наогул можна растлумачыць.

Але вось як сітуацыя выглядае на гэты момант:

Адбыўся беспрэцэдэнтны крадзеж бюджэтных сродкаў праз Федэральную падатковую службу Расейскай Федэрацыі (паводле схемы вяртання фіктыўнага ПДВ — «справа Магніцкага»).

Крадзеж даведзены цалкам, у дзясятцы краін распачатыя крымінальныя справы (але не ў Расеі, вядома ж).

Частка гэтых выкрадзеных грошай дастаецца Дзянісу Кацыву, які неадкладна набывае на іх некалькі кватэр у Нью-Ёрку.

Праз 3 тыдні зяць кіраўніка падатковай службы Расейскай Федэрацыі набывае 5 кватэр у гэтым жа доме ў Нью-Ёрку. Гэта значыць, кватэры юрыдычна напалову належаць ягонай жонцы - сястры Мішусціна.

З абцяжарваючых абставінаў: гэты зяць (Удодаў) шматкроць згадваўся ў СМІ (і пазней фігураваў у крымінальнай справе) як арганізатар ашуканскіх схем для вяртання ПДВ.