Беларускія відэаблогеры: Лукашэнка крыўдзіцца і ваюе з люстэркам

Арышт Алеся Круткіна - помста ўладаў за ягоную грамадскую дзейнасць і вострую крытыку дыктатара.

Вядомыя беларускія відэаблогеры Сяргей Ціханоўскі, Зміцер Казлоў, Аляксандр Кабанаў і Сяргей Пятрухін выступілі ў абарону свайго калегі. Прэс-служба «Еўрапейскай Беларусі» прыводзіць тэкст іх заявы:

- 26 лютага нашага калегу, відэаблогера і актывіста грамадзянскай кампаніі «Еўрапейская Беларусь» Алеся Круткіна асудзілі на 15 дзён арышту. Пастанову аб гэтым прыняў суд горада Лепеля Віцебскай вобласці. Працэс быў закрытым, інфармацыю пра месца і час яго правядзення супрацоўнікі праваахоўных органаў далі толькі пасля заканчэння. Пра суд не ведалі ні сваякі, ні сябры актывіста. Да новага арышту Алесь Круткін ужо правёў месяц за кратамі паводле сфальсіфікаваных абвінавачванняў. Усяго ён будзе знаходзіцца ў турме як мінімум 45 дзён запар.

Мы мяркуем, што такім чынам улады помсцяць Алесю Круткіну за грамадскую дзейнасць і вострую крытыку дыктатара і чыноўнікаў. У сваім відэаблогу ён часта выказваўся аб вострых сацыяльных і палітычных пытаннях і здабыў папулярнасць падпісчыкаў сумленнай і адкрытай пазіцыяй. Замест таго, каб прыслухацца да крытыкі, Лукашэнка крыўдзіцца і ваюе з люстэркам, у якім усяго толькі адбіваюцца рэаліі сучаснай Беларусі.

Мы патрабуем ад беларускіх уладаў неадкладнага вызвалення Алеся Круткіна і спынення неабгрунтаванага ціску на незалежных блогераў і журналістаў.

Мы заклікаем сваіх калег да салідарнасці з Алесем Круткіным і просім усіх беларусаў падтрымаць незалежных блогераў і журналістаў.

Мы просім палітыкаў і грамадскіх дзеячаў падняць пытанне пра пераслед блогераў і журналістаў на міжнародным узроўні.

Мы мяркуем, што Алесь Круткін павінен быць прызнаны палітычным зняволеным і заклікаем палітыкаў, праваабаронцаў, грамадскіх дзеячаў актыўна дамагацца ягонага вызвалення і спынення рэпрэсій супраць незалежных блогераў і журналістаў.

Свабоду Алесю Круткіну! Свабоду незалежным блогерам і журналістам!