Амаль $13 мільярдаў украінцы пералічылі з-за мяжы на радзіму
30- 27.02.2020, 16:35
- 10,866
Гэта спрыяла росту ўзроўню сярэдняга заробку ва Украіне.
Паводле інфармацыі Міністэрства фінансаў Украіны, у 2019 годзе працоўныя мігранты пералічылі ў краіну $12,9 млрд. Такія звесткі міністэрства прыводзіць у справаздачы аб выкананні бюджэту за 2019-ы, які апублікавалі ў афіцыйнай прэсе ўрада, паведамляе hromadske.ua.
Там адзначаюць, што цягам 2019-га аб'ём грашовых пералічэнняў мігрантаў вырас на 12,2% у параўнанні з папярэднім годам і спрыяў росту ўзроўню сярэдняга заробку ва Украіне.
«Фактарамі пашырэння попыту з боку насельніцтва ў 2019 годзе выступалі: рост рэальнага заробку на 9,8% у фоне прадаўжэння палітыкі ўрада для падвышэння мінімальнага заробку (на 12,1%) і высокага ціску на рынку працы з прычыны працоўнай міграцыі», - гаворыцца ў справаздачы Мінфіна.
Акрамя гэтага, у Мінфіне адзначаюць, што высокая працоўная міграцыя ўкраінцаў за мяжу спрыяла памяншэнню беспрацоўя ва Украіне да 7,3%, што з'яўляецца найлепшым паказчыкам за апошнія 6 гадоў.
Адзначым, што паводле папярэдніх звестак Нацыянальнага банка Украіны, які вядзе статыстыку грашовых пералічэнняў украінскіх работнікаў, аб'ёмы гэтых пералічэнняў у 2019 годзе склалі блізу $12 млрд, гэта значыць, амаль на $1 млрд менш, чым адзначылі ў Мінфіне. У 2018 годзе аб'ёмы пералічэнняў складалі $10,88 млрд.
За тры кварталы 2019-га працоўныя мігранты пералічылі ва Украіну $8,74 млрд, з якіх $2,82 млрд склалі пералічэнні з Польшчы.