Бронзавая прызёрка ЧС у боксе Кавалёва: За медаль не раздрукавалі нават лісцік А4

Кацярына Кавалёва сышла з нацыянальнай каманды Беларусі.

Бронзавая прызёрка чэмпіянату свету ў боксе сярод жанчын у катэгорыі звыш 81 кг Кацярына Кавалёва патлумачыла, што не мае намеру працягваць выступаць за беларускую каманду, і патлумачыла, якія прычыны прымусілі прыняць кардынальнае рашэнне, паведамляе pressball.by.

- Мне паступае нямала пытанняў на тэму таго, чаму я пайшла з нацыянальнай каманды ў боксе. Акрамя таго, птушачкі нашапталі, што я няўдзячная, нягодніца і ледзь не пачвара! І ўсе робяць нявінны выгляд, быццам бы не разумеючы, у чым прычына. Такім чынам, у кастрычніку 2019 года я ездзіла на чэмпіянат свету ў боксе. Перад тым, як пачаць да яго падрыхтоўку, задала пытанне: ці будуць мне вылучаныя грашовыя сродкі або прэмія, калі пакажу вынік. Груба кажучы, калі прывязу медаль. Бо не хацелася другім разам станавіцца на тыя ж граблі - як у 2015-м, калі мяне краіна таксама нічым не аддзячыла за золата ЧС і нават не вярнула грошы за паездку. Мне адказалі так: маўляў, вядома, сваіх спартоўцаў цэнім і заахвочваем. Вядома, гэта стала дадатковай матывацыяй.

І што ж аказалася? Пасля бронзы ЧС-2019 мяне на працягу двух-трох месяцаў папросту «адфутбольвалі». Адны адпраўлялі да другіх, трэція - да чацвёртых. Доўжылася такая каніцель, і было адчуванне, што я нібыта да ўсіх жабраваць хаджу. У той жа час бачыла, як годна былі сустрэтыя і ацэненыя мае канкурэнткі ў ЧС: кветкі, заахвочвальныя граматы, прэміі... Усіх адправілі на аднаўленчы адпачынак да мора. Мне ж не сказалі нават «дзякуй». Нават ніхто не знайшоў час раздрукаваць лісцік фармату «А4». Маўляў, мы рады, што ты такая наогул існуеш і дзякуем табе за дасягненні. Нічога не было зроблена наогул!

Урэшце дайшла да старшыні Беларускай федэрацыі бокса. На што атрымала адказ: «Якая табе прэмія? Яна табе не належыць наогул! Табе не хапіла адной спартсменкі сярод удзельніц у катэгорыі для прэміі». Вось так: усім усюды хапіла, а Кавалёвай - не хапіла. Затое для прысваення звання «Майстар спорту міжнароднага класа» хапіла. Ну і ўсё. Далей - нібыта трэніруйся. Праз два гады ў цябе зноў ЧС, трэба выйграваць. Я між волі задумалася: і які ў гэтым сэнс? Каб выжываць? Я камусьці на заробак напрацавала, а мне зусім нічога? З такой матывацыяй і такім стаўленнем далёка не заедзеш. Гэта галоўная прычына, па якой разарвала ўсялякія стасункі з нацыянальнай камандай у роднай краіне.

У дадатак... Тут не буду называць прозвішчаў. Але прыбіла і стаўленне да спартсменаў у трэніровачным працэсе. У камандзе добрыя трэнеры і спартоўцы. Але ўсе - як быццам статак, усе ўсё павінны рабіць як пад капірку. Ніхто не надае ўвагі псіхалагічным асаблівасцям і таму, што ўсе людзі розныя і да кожнага важны індывідуальны падыход. На апошнім зборы неаднаразова скардзілася на дрэннае самаадчуванне, у мяне быў моцны кашаль. Мне ж гаварылі, што я прыкідваюся! І нібыта бронзавыя прызёры не маюць права адпачываць, а абавязаны працаваць! А захворванне ледзь не перарасло ў хранічнае. Толькі праз два тыдні даведалася, што гэта быў востры трахеід, які будзе пераходзіць у хранічную форму.

На фоне такога стаўлення і таго, што давялося патраціць немалыя асабістыя сродкі, каб нармалізаваць дыхальную сістэму, не ўбачыла сэнсу далей працягваць займацца спортам у роднай краіне, - канстатавала Кавалёва ў сваім «інстаграме».