У Берасці пенсіянеры накуплялі алкаголю па чужой картцы

Забытая ў банкамаце банкаўская картка пацягнула за сабой цэлы ланцужок незаконных дзеянняў.

Падрабязнасці 27 лютага распавялі ў прэс-службе УУС Берасцейскага аблвыканкама.

У міліцыю звярнуўся берасцеец, які заявіў, што страціў банкаўскую картку, але па ёй здзейсненыя некалькі аплатных аперацый. Картку мужчына меркавана забыўся ў банкамаце, аднак там яе не аказалася.

- Аператыўнікам удалося ўзнавіць ход падзей. Калі мужчына адышоў ад банкамата, сапраўды, забыўшыся забраць картку, да апарата падышоў іншы чалавек. Убачыўшы забытую картку, ён проста вырваў яе і шпурнуў у смеццевую скрыню. Яшчэ праз невялікі прамежак часу на кінутую картку ўвагу звярнуў 71-гадовы пенсіянер, - растлумачылі ў прэс-службе.

Пажылы берасцеец, узяўшы з сабой 71-гадовага таварыша, адправіўся ў краму па спіртныя напоі. За пакупкі ён заплаціў чужой картай.

Матэрыялы справы адпраўленыя на прававую ацэнку.