Дзяўчына студэнта, шпіталізаванага з каранавірусам, распавяла, як гэта было
- 28.02.2020, 17:45
- 49,252
Медыкі прыехалі ўначы.
Студэнт БНТУ, у якога выявілі каранавірус 2019-nCoV, знаходзіцца ў Менскай гарадской клінічнай інфекцыйнай лякарні. У гэтую ж медустанову шпіталізаваная і ягоная дзяўчына Паліна, а таксама яе бацькі і стрыечная сястра. Паліна пагадзілася распавесці tut.by, як усё адбывалася.
Каранавірус 2019-nCoV выявілі ў студэнта з Ірана, які вучыцца на перадапошнім курсе механіка-тэхналагічнага факультэта БНТУ. Яго завуць Парса, яму 21 год.
З Палінай яны сустракаюцца даволі даўно. З Ірана ў Беларусь Парса вярнуўся ўранку 22 лютага, пацвярджае дзяўчына. Апошнім часам ён часта бываў у яе дома, але жыў у інтэрнаце, кажа яна. Увечары 27 лютага, калі іх усіх шпіталізавалі, студэнт таксама быў у гасцях у сваёй дзяўчыны. Ніякіх скаргаў на самаадчуванне ў яго не было.
- Прыкладна а 23.20 на тэлефон Парсы патэлефанавалі медыкі, сказалі, каб усе, хто знаходзіцца дома, збіраліся ў лякарню, - распавядае Паліна. - Калі мы спыталі, чаму, нам адказалі, што неўзабаве прыедзе брыгада і ўсё падрабязна растлумачыць.
Са слоў Паліны, сям'я чакала хвілін 20-30, пакуль медыкі перапрануцца ў спецыяльную вопратку, прадэзінфікуюць аўто знутры і звонку. Следам за імі прыехала яшчэ адна брыгада хуткай.
- Медперсанал зайшоў у дом, распавёў пра тое, чаму яны да нас прыехалі. Пачалі пытацца пра нашы кантакты за апошні час: хто дзе быў, з кім меў стасункі. Таксама нам вымералі тэмпературу, спыталі, як сябе адчуваем, ці ёсць нейкія сімптомы дрэннага самаадчування.
Хлопца Паліны пасадзілі ў машыне хуткай дапамогі ў адмысловым боксе. Сама дзяўчына і яе сваякі ішлі самастойна.
Цяпер Парса, Паліна, яе бацькі і стрыечная сястра знаходзяцца ў Менскай гарадской інфекцыйнай лякарні. Прыкладна а 3 гадзіне ночы, кажа дзяўчына, ва ўсіх сямейнікаў узялі аналізы. Паводле яе слоў, вынікі павінны быць вядомыя да 14 гадзін дня.
Проста цяпер Паліна знаходзіцца ў двухмеснай ізаляванай палаце. Разам з ёй - стрыечная сястра, з якой апошнім часам яна мела стасункі. Выходзіць з палаты ім забаронена.
- Усе адчуваюць сябе нармальна, - кажа дзяўчына. - Да сённяшняга дня толькі ў мяне былі сімптомы прастуды. У панядзелак я прамокла і прамерзла, у аўторак пачаўся лёгкі насмарк і дрыжыкі. Але гэта ўсё.
Колькі Паліна і яе сям'я прабудуць у шпіталі, залежыць ад вынікаў аналізаў. Дзяўчына кажа, што лекары ўвесь час цікавяцца, як яна сябе адчувае, пытаюцца, ці баліць горла.