27 кастрычнiка 2020, aўторак, 23:55
Сім сім, Хартыя 97!
Рубрыкі

Столтэнберг: NATO абароніць Турцыю з паветра

Столтэнберг: NATO абароніць Турцыю з паветра

Паветраныя атакі з боку РФ і Асада спыняцца.

Паводле інфармацыі Yeni Şafak (пераклад – inosmi.ru), генеральны сакратар NATO Енс Столтэнберг (Jens Stoltenberg) паводле вынікаў экстранага паседжання NATO, якое было скліканае на ўзроўні амбасадараў чальцоў альянсу на просьбу Турцыі, заявіў, што Паўночнаатлантычны ваенны блок падтрымае Турцыю ў яе барацьбе з сіламі Башара Асада ў правінцыі Ідліб на паўночным захадзе Сірыі некалькімі рознымі метадамі, у тым ліку шляхам абароны з паветра. Гэтыя захады дапамогуць забяспечыць спыненне паветраных нападаў з боку Сірыйскай арабскай арміі.

Генеральны сакратар альянсу адзначыў, што хаўруснікі выказваюць спачуванні Турцыі ў сувязі з трагедыяй, якая адбылася мінулай ноччу, у выніку якой Турцыя страціла сваіх вайскоўцаў. Столтэнберг падкрэсліў, што чальцы альянсу асуджаюць гэта напад, здзейснены вайскоўцамі пад кіраўніцтвам Башара Асада. «Мы адкрыта заклікаем Расею і рэжым спыніць атакі, мы заклікаем Сірыю выконваць міжнароднае права», – заявіў ён.

Паводле словаў Столтэнберга, неабходна тэрмінова вярнуцца да рэжыму спынення агню, дасягнутага ў 2018 годзе, у адваротным выпадку гуманітарны крызіс пагоршыцца. NATO падтрымлівае Турцыю і разглядае яе як вельмі каштоўную хаўрусніцу, адзначыў ён. «Турцыя з'яўляецца домам для мільёнаў бежанцаў, – прадоўжыў Столтэнберг. – NATO падтрымае Турцыю некалькімі спосабамі. У тым ліку сродкамі паветранай абароны. Гэта дазволіць спыніць паветраныя атакі з боку Сірыі. Мы прадоўжым абараняць паўднёва-ўсходнюю мяжу NATO».

«Сотні тысячаў чалавек былі вымушаныя пакінуць свае дамы, – падкрэсліў Столтэнберг. – Сёння хаўруснікі NATO выказваюць Турцыі сваю падтрымку. Мы прапануем замяніць сродкі супрацьпаветранай абароны. Ёсць самалёты ранняга папярэджання і назірання. Хаўруснікі NATO заўсёды думаюць пра тое, што яшчэ яны могуць зрабіць для большай падтрымкі Турцыі».

Пры адказе на пытанне, ці можна чакаць ад NATO больш канкрэтных крокаў, Столтэнберг адзначыў, што NATO прапануе Турцыі моцную палітычную і практычную падтрымку, хаўруснікі ўважліва сочаць за сітуацыяй у рэгіёне. «Хаўруснікі ў NATO падтрымліваюць мірнае развязанне гэтага пытання пад эгідай ААН, – сказаў генеральны сакратар. – І на гэтым этапе мы заклікаем Сірыю, Турцыю і Расею прытрымлівацца менавіта такіх захадаў».