Турцыя адкрыла мяжу ў ЕЗ для сірыйскіх уцекачоў

Эрдаган заявіў, што мяжу ўжо перасеклі 18 тысяч мігрантаў.

Прэзідэнт Турцыі Раджэп Таіп Эрдаган пацвердзіў, што Турцыя адкрыла мяжу для ўцекачоў, якія хочуць трапіць у ЕЗ, на фоне абвастрэння сітуацыі ў сірыйскім Ідлібе.

Пра гэта паведамляе "Еўрапейская праўда" са спасылкай на турэцкае выданне Hurriyet.

"Што мы казалі некалькі месяцаў таму: нам давядзецца адчыніць дзверы, калі сітуацыя і далей будзе такой. Што мы зрабілі ўчора? Мы адчынілі дзверы і на сёння 18 тысяч мігрантаў перасеклі мяжу", - сказаў турэцкі прэзідэнт на сустрэчы з дэпутатамі ў Стамбуле.

"Я думаю, сёння іх колькасць дасягне 25-30 тысяч. Мы не будзем зачыняць дзверы ў будучыні, гэта будзе працягвацца", - дадаў ён.

Тлумачачы, чаму Турцыя прыняла гэтую пастанову, ён сказаў, што "ЕЗ павінен трымаць сваё слова".

"Нам не трэба клапаціцца пра такую колькасць уцекачоў і карміць іх. Калі вы сумленныя, калі вы шчырыя, вы ўкладаеце сваю частку. Калі вы гэтага не зробіце - мы адчыняем дзверы", - сказаў Эрдаган.

Нагадаем, напярэдадні СМІ са спасылкай на крыніцы паведамілі, што Анкара пастанавіла не стрымліваць уцекачоў, якія хочуць трапіць у ЕЗ морам ці сушай. Гэта пастанова была прынята пасля гібелі 33 турэцкіх салдат у сірыйскай правінцыі Ідліб у выніку нападу войскаў Башара Асада.

Прэзідэнт Турцыі ўжо даўно заяўляў, што ЕЗ не выконвае сваіх абавязацельстваў паводле падпісаных у 2016 годзе пагадненняў, згодна з якімі Турцыя паабяцала ўтрымліваць сірыйскіх уцекачоў на сваёй тэрыторыі ў абмен на фінансавую дапамогу на некалькі мільярдаў еўра. Брусэль адхіляе прэтэнзіі і кажа, што выплачвае гэтыя сродкі.

У Турцыі ўжо некалькі гадоў запар знаходзіцца блізу 3,6 мільёна ўцекачоў з абхопленай вайной Сірыі. Частка з іх жыве ў часовых лагерах паблізу сірыйскай мяжы, частка - раз'ехалася па тэрыторыі краіны.