Раскрытая таямніца старажытных папярэднікаў мая

Яны належалі да дзвюх розных групаў.

Навукоўцы Гейдэльбергскага ўніверсітэта ў Нямеччыне знайшлі ў сетцы пячораў побач з мексіканскім горадам Тулум старажытны шкілет 30-гадовай жанчыны. Знаходка раскрывае таямніцу пра папярэднікаў мая, якія, як высветлілася, належалі дзвюм розным групам. Пра гэта паведамляецца ў прэс-рэлізе на phys.org (пераклад – lenta.ru).

Даследнікі выявілі старажытныя чалавечыя рэшткі, якія захаваліся на 30 адсоткаў, у пячоры Чан Хол. Яны пазначаныя як Chan Hol 3. Вынікі датавання паказалі, што жанчына жыла не менш як 9900 гадоў таму. Асаблівасці яе чэрапа адпавядаюць тым, што былі выяўленыя ў трох іншых чарапоў з пячоры Тулум. Напрыклад, у яе быў карыес, што паказвае на дыету, багатую на цукар.

Навукоўцы мяркуюць, што характарыстыкі чэрапа кажуць пра існаванне дзвюх марфалагічна розных групаў людзей, якія жылі ў Мексіцы асобна адна ад адной падчас пераходу ад плейстацэну да галацэну. Альбо гэтыя групы першапачаткова прыбылі на паўвостраў Юкатан, альбо невялікі лік пасяленцаў пачаў жыць ізалявана, чаму чарапы ў іх развілі спецыфічнасці.

Вядома, што людзі жывуць на паўвостраве Юкатан у Мексіцы пачынаючы з позняга плейстацэну (126–11,7 тысячы гадоў таму). Археолагі выявілі дзевяць добра захаваных чалавечых шкілетаў, якія належалі гэтым раннім пасяленцам.