Інтрыга «Оскара» з беларускім адценнем

Заўзеем за Скарлет.

Прачнуўшыся раніцай 10 лютага, мы даведаемся, каго ў гэтым годзе Амерыканская кінаакадэмія ўзнагародзіла запаветнымі статуэткамі.

Гэтым разам у беларусаў ёсць свой інтарэс на «Оскар» (цырымонія пройдзе 9 лютага). Сярод намінантак - акторка з беларускімі каранямі, піша «Салiдарнасць».

Прычым Скарлет Ёхансан прэтэндуе на перамогу адразу ў дзвюх намінацыях: «Найлепшая актрыса» (за галоўную жаночую ролю ў фільме «Шлюбная гісторыя») і «Найлепшая акторка другога плана» («Трус Джоджо»).

Першая ўзнагарода, зразумела, больш прэстыжная. Але, паклаўшы руку на сэрца, у «Труса Джоджо» Скарлет выглядае значна цікавей і эфектней, чым у банальнай «Шлюбнай гісторыі». Так што, які б з «Оскараў» Ёхансан не атрымала, мы засмучаныя не будзем. Галоўнае - не застацца двойчы з носам.

35-гадовая Скарлет Ёхансан дэбютавала ў кіно чвэрць стагоддзя таму. Яе першы фільм, назва якога знаёмага шырокаму колу гледачоў - «Адзін дома 3». Зоркай першай велічыні светлавалосая акторка стала пасля працы з Сафіяй Капала ў «Цяжкасці перакладу» і Вудзі Аленам у «Матч-пойнце».

Аднак да 2020 года намінацый на «Оскар» у Ёхансан не было (хоць імянная зорка на галівудскай Алеі Славы ёсць ужо даўно). Цяпер Скарлет упершыню прэтэндуе на ўзнагароду Амерыканскай кінаакадэміі.

Зрэшты, якім бы ні быў вердыкт журы, найменне сэкс-сімвала ў Ёхансан ужо ніхто не адбярэ. Скарлет неаднаразова прызнавалася самай прыгожай знакамітасцю: паводле версіі Playboy, Esquire, FHM... А хакеры прымудрыліся здабыць і выкласці ў сетку асабістыя фота актрысы, на якіх яна цалкам аголена.