29 сакавiка 2024, Пятніца, 18:56
Падтрымайце
сайт
Сім сім,
Хартыя 97!
Рубрыкі

На Брытанію абрынуўся магутны ўраган «Сіяра»

2
На Брытанію абрынуўся магутны ўраган «Сіяра»
Фотa: Getty Images

Хуткасць ветру перавышае 144 кіламетры на гадзіну.

Практычна на ўсёй тэрыторыі Вялікай Брытаніі абвешчаны павышаны жоўты ўзровень небяспекі ў сувязі з магутным штармавым ветрам і ліўнямі, якія ў нядзелю прынёс ураган «Сіяра», паведамляе ВВС.

Хуткасць ветру, паводле інфармацыі сіноптыкаў, перавышае 90 м/г (144 км/г). Ёсць небяспека сур'ёзных паводак у многіх частках краіны.

Многія авіякампаніі ўключна з British Airways скасавалі свае міжнародныя і ўнутраныя рэйсы або значна скарацілі іх колькасць.

Часова прыпыненае паромнае злучэнне на розных кірунках.

Фотa: PA MEDIA

Кампанія Network Rail, якая адказвае за чыгуначныя злучэнні ў Брытаніі, выпусціла папярэджанне аб захаванні максімальнай хуткасці 50 м/гадзіну (80 км/ г), многія рэйсы цягнікоў скасаваныя або ходзяць са спазненнем праз паваленыя на чыгуначнае палатно дрэвы. Кампанія-аператар хуткасных дарог у Англіі Highways England змясціла ў «Твітэры» фота грузавіка, які падае ад ветру, і кіроўца якога адкараскаўся лёгкім спалохам.

У нядзелю ў Лондане закрытыя для шпацыру ўсе каралеўскія паркі разам з Гайд-паркам і Рыджэнтс-паркам праз пагрозу падзення старых дрэў. Каралева Элізабэт Другая, якая знаходзіцца ў сваёй рэзідэнцыі ў Сандрынгеме ў графстве Норфалк, праз надвор'е адмовілася ад нядзельнага наведвання царквы.

Фотa: NETWORK RAIL

Праз ураган «Сіяра» скасаваны нядзельны матч Прэм'ер-лігі паміж камандамі «Манчэстар-сіці» і «Уэст-Хэм». Аднак каманды «Шэфілд-Юнайтэд» і «Борнмут» усё ж наважыліся выйсці на поле, нягледзячы на надвор'е.

Фотa: SOUTH SHORE FIRE STATION
Фотa: PA MEDIA

Мацней за ўсё ўраган «Сіяра» абрынуўся на Уэльс, дзе ў асобных частках парывы ветру дасягалі 150 км/г. Метэаралагічная служба паведамляе, што ў панядзелак на поўначы Англіі магчымыя моцныя снегапады, што можа прывесці да абледзянення дарог. Там жоўты ўзровень небяспекі захаваецца да вечара панядзелка.

Фотa: Getty Images

Ураган «Сіяра» адчуваецца і ў мацерыковай Еўропе: у Францыі, Бельгіі, Ірландыі і Нідэрландах таксама чакаецца шквальны вецер і праліўныя дажджы.

Скасаваныя некаторыя авіярэйсы ў Бельгіі і Нямеччыне.

Напісаць каментар 2

Таксама сачыце за акаўнтамі Charter97.org у сацыяльных сетках