Нідэрландскія навукоўцы знайшлі антыцела да каранавірусу
16- 15.03.2020, 17:17
- 40,811
Адкрыццё зрабілі ў Медыцынскім цэнтры Універсітэта Эразмуса ў Ратэрдаме і Універсітэце горада Утрэхта.
Нідэрландскія навукоўцы з Медыцынскага Цэнтра Універсітэта Эразмуса ў Ратэрдаме (Нідэрланды) і Універсітэта горада Утрэхта знайшлі антыцела да COVID-19. Пра гэта паведаміў журналіст Андрэй Цапліенка са спасылкай на нямецкае выданне «Эрасмусмегезін», піша zn.ua.
«Сусветная прэм'ера ад Медыцынскага Цэнтра Універсітэта Эразмуса ў Ратэрдаме (Нідэрланды) і Універсітэта горада Утрэхта: яны знайшлі антыцела да COVID-19. Навуковая публікацыя групы з дзесяці навукоўцаў рыхтуецца да ацэнкі вядучым навуковым часопісам «Nature», - гаворыцца ў артыкуле выдання, які апублікавалі вечарам 14 сакавіка.
Знойдзенае антыцела здольнае блакаваць інфекцыю SARS1 і SARS2, гэта значыць, з'яўляецца першым за ўсю гісторыю антыцелам супраць каранавірусу.
Антыцела яшчэ трэба праверыць на людзях (для гэтага спатрэбяцца месяцы), і артыкул яшчэ ацэняць экспэрты, перад тым, як «Nature» апублікуе яго, але навукоўцы спадзяюцца, што адбудзецца гэта найбліжэйшым часам.
Фрэнк Гросвельд, адзін з навукоўцаў, якія адкрылі антыцела, адзначыў: «Разам з аддзяленнем даследавання вірусаў і аддзелам вірусалогіі факультэта ветэрынарнай медыцыны Утрэхтскага ўніверсітэта мы далучыліся да еўрапейскага праекту: ZAPI (Zoonosex Anticipation and Preparedness Initiative, - рэд.). Яго мэтай было выяўленне антыцелаў супраць MERS, SARS і іншага ганконгскага каранавірусу (OC-43). Падчас працы ў гэтым праекце мы знайшлі антыцелы, якія крыжавана рэагавалі з гэтымі трыма рознымі вірусамі і не давалі імі заразіцца. Гэтыя вірусы ўжо вывучаныя, аднак, цяпер мы маем справу з іншым каранавірусам. Калі ўспыхнуў цяперашні крызіс - SARS2, мы неадкладна праверылі, ці рэагуюць антыцелы, якія рэагавалі на SARS1, на SARS2. Так мы знайшлі антыцела, пра якое цяпер паведамілі».
У далейшым навукоўцы плануюць прыцягнуць да працы фармацэўтычную кампанію. Перш, чым гэтыя лекі запусцяць у продаж, антыцела павінна прайсці даследаванні і праверкі на таксікалагічныя ўласцівасці. Цяпер гэты працэс прадаўжаецца.
«У дадатак да распрацоўкі лекавага сродку мы таксама хочам выкарыстоўваць антыцела для вытворчасці экспрэс-тэсту, які кожны можа зрабіць дома, каб людзі маглі лёгка даведацца, ці ёсць у іх інфекцыя ці не», - распавёў Гросвельд.