Беларускія лекары з Еўропы і ЗША звярнуліся да ўладаў
58- 22.03.2020, 18:51
- 161,166
У іх ёсць дзевяць патрабаванняў.
Беларускія лекары, якія працуюць у ЗША і Заходняй Еўропе, звярнуліся з адкрытым лістом да ўладаў Беларусі ў сувязі з эпідэміяй віруса COVID-19, паведамляе «Радыё Свабода».
У лісце лекары патрабуюць ад органаў улады ўсіх узроўняў:
- Зачыніць усе навучальныя і дашкольныя ўстановы для наведвання на чатыры тыдні, з наступным прадаўжэннем.
- Забараніць любыя масавыя мерапрыемствы і сходы, якія не дазваляюць удзельнікам знаходзіцца на адлегласці двух і больш метраў адзін ад аднаго.
- Зачыніць спартыўныя і забаўляльныя ўстановы і прадпрыемствы грамадскага харчавання, за выключэннем дастаўкі на дом.
- Рэкамендаваць аддаленыя спосабы працы, гнуткія графікі і ініцыяваць закрыццё на каранцін прадпрыемстваў і арганізацый, якія непасрэдна не ўдзельнічаюць у жыццезабеспячэнні насельніцтва.
- Адразу ж забяспечыць апавяшчэнне ўсіх слаёў насельніцтва аб спосабах абароны ад інфікавання і абмежавання распаўсюджвання інфекцыі, уключаючы правілы паводзін пры ўсеагульным карантыне
- Забяспечыць своечасовае інфармаванне грамадскасці пра бягучую статыстыку захворвання і меры барацьбы з эпідэміяй.
- Забяспечыць работнікаў медыцынскіх устаноў і іншых службаў жыццезабеспячэння ахоўнымі сродкамі, харчаваннем і, пры неабходнасці, дапамогай па догляду за дзецьмі.
- Скасаваць асабістую адказнасць медыцынскіх работнікаў за абнародаванне інфармацыі пра бягучы стан у медыцынскіх установах.
- Актыўна садзейнічаць ўзаемадзеянню дзяржаўных устаноў з грамадскімі і валанцёрскімі арганізацыямі для вышэйпералічаных задач, а таксама для бяспечнага забеспячэння прадуктамі харчавання і медыкаментамі людзей з высокай рызыкай сур'ёзных ускладненняў (людзі старэйшыя за 60 гадоў, з хранічнымі захворваннямі або паніжаным імунітэтам.)
Лекары тлумачаць, чаму гэтыя меры неабходныя менавіта цяпер:
- Вірус хутка распаўсюджваецца ў паўсядзённым жыцці і перадаецца як хворымі людзьмі, так і здаровымі носьбітамі.
- Досвед іншых краін паказаў, што прамаруджанне ўвядзення вышэйпералічаных захадаў прыводзіць да масавай гібелі людзей ва ўмовах надзвычайнай перагрузкі сістэмы медыцынскай дапамогі.
- У гэтай сітуацыі непазбежны высокі ўзровень захворвання і смяротнасці сярод лекараў і медыцынскага персаналу. Толькі запаволенне распаўсюджвання віруса праз своечасовае сацыяльнае дыстанцыяванне (усеагульны карантын) і ізаляцыю хворых, можа дазволіць большай колькасці пацыентаў атрымаць дапамогу і выжыць.
Пад адкрытым лістом падпісаліся лекары з ЗША: Анастасія Пігаль, Сяргей Дзедзік, Т. К., Анастасія Манькоўская, Вольга Годзіна, Вікторыя Казлоўская. Валянціна Балоціна і Крыст Хуб са Швэцыі, Д. Кузьмін і Р. Фарнін з Нямеччыны і А. Мацуткевіч з Польшчы.
«Хвароба не выбірае людзей паводле сацыяльнага статусу ці пасады. Справіцца з ёю можна толькі праз хуткую кансалідацыю намаганняў усяго грамадства. Час лічыцца на гадзіны», — гаворыцца ў адкрытым лісце.