Найбуйнейшы ў гісторыі адток капіталу: інвестары вывелі з краін, якія развіваюцца, $83 мільярды

Якімі будуць наступствы.

Пандэмія каранавіруса прывяла да глабальнай рэцэсіі. Аднаўленне пачнецца ў 2021 годзе.

Пра гэта дырэктарка Міжнароднага валютнага фонду Крысталіна Георгіева заявіла пасля экстранай тэлеканферэнцыі G20 на ўзроўні кіраўнікоў цэнтрабанкаў і міністраў фінансаў, паведамляецца на сайце МВФ.

«Прагноз сусветнага росту: на 2020 год адмоўны, з не менш сур'ёзнай ці яшчэ горшай рэцэсіяй, чым падчас сусветнага фінансавага крызісу. Але ў 2021 годзе мы чакаем аднаўленне. Каб дасягнуць яго, вельмі важна зрабіць упор на стрымліванне пандэміі і ўмацаванне сістэм аховы здароўя - ва ўсім свеце. Эканамічнае ўздзеянне крызісу з'яўляецца і будзе заставацца цяжкім, але чым хутчэй спыніцца распаўсюджванне віруса, тым хутчэй і дынамічней будзе аднаўленне», - сказала яна.

Георгіева падкрэсліла, што краіны з развітай эканомікай агулам маюць вялікія магчымасці для процідзеяння крызісу, тады як многія краіны з фармаваным рынкам і краіны з нізкімі даходамі сутыкаюцца са значнымі цяжкасцямі.

«Яны адчуваюць цяжкія наступствы адтоку капіталу, і захады, што робяцца краінамі для барацьбы з эпідэміяй сур'ёзна адаб'юцца на ўнутранай эканамічнай актыўнасці. З пачатку крызісу інвестары ўжо вывелі з краін з фармаваным рынкам $83 млрд - гэта найбуйнейшы зарэгістраваны адток капіталу за ўсю гісторыю. Нас асабліва непакоіць становішча краін з нізкімі даходамі, якія знаходзяцца ў крытычнай пазыковай сітуацыі, - над гэтай праблемай мы шчыльна працуем з Сусветным банкам», - дадала кіраўніца МВФ.

Паводле ейных слоў, Фонд павялічвае аб'ём экстранага фінансавання. Па дапамогу да МВФ звярнулася амаль 80 краін

«Мы папаўняем сродкі Траставага фонду для абмежавання і пераадолення наступстваў катастроф з мэтай дапамогі бедным краінам. Мы вітаем ужо абвешчаныя абавязацельствы і заклікаем іншых далучыцца да гэтых намаганняў. Мы гатовыя задзейнічаць увесь наш крэдытны патэнцыял, які складае 1 трыльён даляраў ЗША. Мы таксама разглядаем іншыя магчымыя варыянты. Некалькі краін з нізкімі і сярэднімі даходамі звярнуліся да МВФ з просьбай правесці размеркаванне СДР, як мы зрабілі падчас сусветнага фінансавага крызісу, і мы разглядаем гэтую магчымасць з нашымі дзяржавамі-чальцамі», - распавяла Георгіева.

Раней эканамісты інвестбанк Goldman Sachs і Morgan Stanley заявілі, што пандэмія каранавіруса справакавала сусветную рэцэсію. Эканамісты Morgan Stanley цяпер разглядаюць рэцэсію ў сусветнай эканоміцы як «базавы сцэнар». Яны прагназуюць, што ў гэтым годзе яе рост замарудзіцца да 0,9%. У Goldman Sachs прагназуюць, што рост складзе 1,25%.