Беларускі лекар пра тое, якія захады польскіх уладаў варта пераняць

Ён назваў сцэнары развіцця сітуацыі з пандэміяй.

Беларус Міхаіл С. (на просьбу героя імя замененае) працуе сямейным лекарам у дзяржаўных і прыватных клініках. Ён жыве ў маленькай вёсцы ў Падкарпацкім ваяводстве. У інтэрв'ю доктар распавёў, як змянілася работа медыцынскіх устаноў у Польшчы падчас пандэміі, і даў параду беларусам пра тое, як паводзіць сябе ў гэты перыяд, піша gazetaby.com.

Са слоў Міхаіла, існуе некалькі сцэнараў развіцця сітуацыі з пандэміяй.

- Альбо каранавірус амаль знікне, як гэта было з «гішпанкай» або іншым грыпам, напрыклад, свіным. Ці застанецца з намі назаўжды ў паслабленай форме. Час пакажа.

Я не ведаю, як будуць развівацца падзеі ў маёй роднай Беларусі. Але ў Польшчы ўсё, імаверна, будзе доўжыцца яшчэ 2-3 месяцы. Пры ўмове, што людзі будуць паводзіць сябе адказна, а ўлады і міністэрства аховы здароўя распачнуць правільныя крокі.

Што можна сказаць канкрэтна, дык гэта тое, што гэтая пандэмія выявіла нашы недахопы. Нават у Заходняй Еўропе з развітой медыцынай.

Якія захады польскіх уладаў варта было б пераняць беларусам?

- Падчас эпідэміі вельмі важна максімальна абмежаваць кантакты. Я думаю, не варта вынаходзіць ровар, дастаткова зрабіць тое ж самае, што і большасць заходніх краін.

Карантын. Калі ёсць магчымасць, перанясіце сваю працу дадому. Самаізаляцыя магчымая толькі з дапамогай дзяржавы: гэта крэдытныя вакацыі, замарожванне або скасаванне выплат у фонд сацыяльнага страхавання. Патрэбная падтрымка малому і сярэдняму бізнэсу і гэтак далей. У Польшчы ўсё гэта рэалізуецца з большым ці меншым поспехам. Вядома, не без дапамогі ЕЗ.

Ці магчымы такі сцэнар у Беларусі? Складана сказаць. Я не эканаміст, а лекар. І ўсё пералічанае вышэй патрабуе значных фінансавых рэсурсаў.

У Польшчы ў асноўным будуць падтрымлівацца мікрапрадпрыемствы з колькасцю супрацоўнікаў да 10 чалавек. Яны не будуць плаціць унёскі ў фонды сацыяльнага забеспячэння. Таксама малыя прадпрыемствы могуць атрымаць безадсоткавыя крэдыты на суму блізу 5000 злотых (1092 еўры ў эквіваленце).

Лекар даў беларусам некалькі парадаў, якім трэба прытрымлівацца падчас пандэміі:

- Перш за ўсё - гігіена. Мыйце рукі. Не чапайце свой твар. Ізаляцыя. Выходзіць з дому рэальна толькі пры неабходнасці: крама, аптэка і гэтак далей.

Для нас гэты вірус можа быць не больш чым слабай рэспіратарнай інфекцыяй, але для людзей сталага веку і цяжка хворых людзей ён можа скончыцца лякарняй і нават смерцю.

Нядаўна польскія ўлады зрабілі больш жорсткімі карантынныя ўмовы, распавядае Міхаіл. Людзі могуць ездзіць на працу і з працы, а таксама выходзіць у аптэку або краму. Дзіцячыя пляцоўкі і турнікі на вуліцы закрытыя. Грамадскі транспарт ездзіць, максімальная колькасць пасажыраў павінна складаць палову ад колькасці месцаў.

- Да Вялікадня дзеці будуць дома. Адзін з бацькоў дзіцяці ва ўзросце да 8 гадоў мае права на фінансавую дапамогу - 80% ад заробку. Гэта колькі ж, як «бальнічны».

У паліклініках усё працуе праз інфалініі, пацыентам выпісваюць электронныя рэцэпты праз тэлефон

Падчас пандэміі работа медыцынскіх устаноў у Польшчы змянілася.

- У Польшчы лякарні адмаўляюць у планавых аперацыях. Прымаюць толькі тэрміновыя выпадкі, - кажа Міхаіл. - У паліклініках усё працуе праз інфалініі. Як лекары першага кантакту (сямейныя), так і спецыялісты. Напрыклад, лоры, кардыёлагі, пульманолагі і гэтак далей.

Дзверы ў паліклінікі закрытыя. Толькі пасля ўступнай гутаркі з лекарам пацыент мае права прыйсці на абследаванне.

У Міхаіла з'явілася больш працы.

- Кожны дзень людзі звяртаюцца па дробных справах. Але ёсць і плюсы. З пачатку года лекары абавязаныя выпісваць электронныя рэцэпты. Гэта значыць, пацыент тэлефануе на рэгістрацыю ці асабіста лекару. Ён прызначае лекі людзям з хранічнымі захворваннямі, паведамляе пацыенту код рэцэпту. І ён адразу ж ідзе ў аптэку па лекі.

Са слоў Міхаіла, у польскіх аптэках і крамах недастаткова сродкаў дэзінфекцыі. Ёсць таксама праблемы з маскамі, бо цяпер усё ідзе па дзяржаўных закупах.

У кабінеце Міхаіл мае сродкі дэзінфекцыі, хірургічныя маскі, аднаразовы халат, ахоўныя акуляры - на выпадак, калі прыйдзе пацыент з падазрэннем на каранавірус.

- І гэта ў дзяржаўнай (грамадскай) паліклініцы. Таму што ў прыватнага сектара заўсёды ўмовы крыху лепшыя.