30 сакавiка 2020, панядзелак, 18:43
Народны карантын
Рубрыкі

Беларускі кіроўца не пагадзіўся з коштам страхоўкі – і перамог

18
Беларускі кіроўца не пагадзіўся з коштам страхоўкі – і перамог
ІЛЮСТРАЦЫЙНАЕ ФОТА

Лайфхакі ад матацыкліста.

Банальна, але факт: вельмі карысна разлічыць кошт жаданай страхоўкі да паходу да агентаў. Яшчэ банальней: не менш карысна ўважліва чытаць дакументы. Як паказала гісторыя нашага чытача, які надумаў аформіць поліс на матацыкл, гэтыя простыя парады дапамогуць зэканоміць вам грошы, піша «Аўтабізнэс».

«З вас 18 еўраў!»

Яўген (чытач «Аўтабізнэсу»): «Справа была так: набыў матацыкл у індывідуальнага прадпрымальніка. Увозіўся транспарт у Беларусь з Канады, на руках маю дамову набыцця-продажу, рахунак-даведку, мытную дэкларацыю і СБКТС для пастаноўкі на ўлік. Засталася дробязь – выпісаць страхоўку на 15 дзён і ехаць у ДАІ ставіць на ўлік. Прыязджаю ў страхавую кампанію і кажу: “Мне страховачку на 15 дзён, калі ласка”. І, аддаючы ўсе дакументы для выпіскі страхоўкі, рыхтую 6 рублёў.

І тут мне агент заяўляе: “З вас 18 еўраў!” Я ў адказ: “Не зразумеў, што за глупства? Якія 18 еўраў?” Відавочна нешта не так. Я ж на калькулятары страхоўку дома палічыў, выйшла, што з мяне 6 рублёў. Страхавы агент адказаў, што транспартны сродак не было зарэгістраваны ў Беларусі да гэтага, апошняя рэгістрацыя была ажыццёўленая за мяжой, таму з мяне бяруць грошы як з нерэзідэнта.

Я парырую: маўляў, мы страхуем МС або маю грамадзянскую адказнасць перад іншымі ўдзельнікамі руху? Паўгадзіны спрэчак ні да чаго не прывялі. Мне, як і раней, кажуць, што транспартны сродак не быў зарэгістраваны ў Беларусі, а я адказваю, што розніцы няма. Запатрабаваў дакумент, на які спасылаўся страхавы агент.

Тут набыў, але не сам прывёз

Яго прынеслі, і мы разам з яшчэ дзвюма супрацоўніцамі, якія падключыліся да дыялогу, пачалі ўважліва чытаць.

І тут я, чытаючы іх дакумент, разумею, што яны альбо некампетэнтныя, альбо мэтанакіравана ўводзяць народ у зман. І магчыма, не толькі мяне аднаго. Цытую: “Калі грамадзянін набыў ТС за межамі РБ, то ён аплачвае страхоўку як нерэзідэнт РБ”, гэта значыць дорага. “Добра, – кажу я, – але гэта калі б я сам набыў ТС за межамі РБ. Аднак я набыў матацыкл у РБ у прадпрымальніка, які прывёз у краіну партыю такіх МС. Навошта мне тады прыплятаюць гэты пункт?”

Я ім шмат разоў паўтараў, што набыў транспартны сродак у Беларусі, паказваў рахунак-даведку і дамову, якія ўсё гэта пацвярджаюць. Значыць, да гэтага пункта я не адношуся, а адношуся да таго, у якім напісана, што калі грамадзянін набыў у дылера МС, увезены ім на тэрыторыю РБ, то ён аплачвае страхоўку паводле тарыфаў рэзідэнтаў РБ, гэта значыць як за набытае тут.

У адказ: “Набыў не ў дылера, а ў нейкага там індывідуальнага прадпрымальніка” і іншае. Пачалі мне казаць нешта пра афіцыйных дылераў, але гэта не мае дачынення да гэтага дакумента, там напісана проста слова “дылер”. Карацей, сабралася ўжо чалавек 8–10 з кіраўнікамі і намеснікамі. Я не сунімаўся і стаяў на сваім.

“Ёсць розніца – плаціць 45 рублёў ці 5-6”

Пачалі тэлефанаваць у Міністэрства. Там нічога выразна не патлумачылі і адправілі да распрацоўнікаў інструкцыі – яшчэ паўгадзіны на тэлефоне.

У выніку на іншым канцы проваду адказалі, што я маю рацыю, браць з мяне трэба мінімум, бо я набыў транспартны сродак у Беларусі, маю рахунак-даведку, ДКП, мытную дэкларацыю, аформленую на дылера. Таксама ў маёй мытнай дэкларацыі было відаць, што гэты ІП завёз на тэрыторыю РБ партыю матацыклаў з 30 штук і прадаў мне адзін з іх. Паўтары гадзіны змарнаванага часу, але я дамогся праўды.

Хачу, каб усе ведалі, з чым можна сутыкнуцца пры страхаванні транспарту. Нікога не слухайце, патрабуйце дакументы, на якія спасылаюцца страхавальнікі, – там выразна напісана, паводле якіх тарыфаў вас павінны страхаваць. Думаю, ёсць розніца – плаціць 45 рублёў або 5-6 за страхоўку на 15 дзён».