У Светлагорску «пакупнік» з'ехаў на Mercedes падчас тэст-драйву
11- 7.03.2020, 16:24
- 25,716
Маладзён з'яўляецца дырэктарам фірмы.
У Светлагорску падчас тэст-драйву пакупнік скраў іншамарку. Аўто знайшлі ў Менскай вобласці, паведамілі БелТА ў МУС.
У лютым 22-гадовы жыхар Чэрвеньскага раёна наткнуўся ў інтэрнэце на аб'яву аб продажы Mercedes-Benz W212. Праз тэлефон з прадаўцом ён дамовіўся пра сустрэчу ў Светлагорску.
Пакупнік прыехаў у райцэнтр увечары 25 лютага. Пасля агляду аўтамабіля зладзілі тэст-драйв. Істотных нараканняў на іншамарку не было, пасля невялікага торгу мужчыны дамовіліся аб куплі-продажу.
«Маладзёны заехалі на гарадскую АЗС, дзе гаспадар іншамаркі адлучыўся. На вуліцы застаўся ягоны знаёмы і пакупнік. Апошні папрасіў дазвол сесці за стырно нібыта для паўторнага тэст-драйву. Нічога не падазраючы, мужчына не адмовіў, а пакупнік скарыстаўся момантам і выкраў аўтамабіль», - распавялі ў Светлагорскім РАУС.
Пра здарэнне пацярпелы паведаміў у міліцыю. Шпегі высветлілі асобу падазраванага, аднак да таго моманту ён ужо знаходзіўся за межамі Гомельшчыны. Маладзёна затрымалі ў родным аграгарадку. З ягоных слоў, адважыўся на злачынства ў надзеі на тое, што гаспадар не заявіць аб крадзяжы: Mercedes быў з расейскімі нумарамі і, магчыма, з абмежаваннямі ў продажы.
Цяпер падазраваны ў ізалятары часовага ўтрымання. Следчыя далі прававую ацэнку ягоным дзеянням. Па факце рабавання ў значнай суме распачатая крымінальная справа. Маладзён з'яўляецца дырэктарам фірмы і раней не прыцягваўся да крымінальнай адказнасці.