Асяродкі COVID-19 - у санаторыях і дамах адпачынку: новая інфармацыя з рэгіёнаў Беларусі
19- 10.04.2020, 10:37
- 50,899
Лекары ў ахоўных касцюмах забіраюць адпачывальнікаў.
Учора ўжо паведамлялася пра тое, што каранавірус знойдзены ў санаторыі «Белая Вежа» ў Камянецкім раёне Берасцейскай вобласці. Сёння стала вядома, што хворыя ёсць і ў санаторыі «Алеся», размешчаным у вёсцы Завышша, Іванаўскага раёна Берасцейскай вобласці, паведамляе тэлеграм-канал «Баста».
«25-гадовую жанчыну з дзіцем, якія адпачывалі ў «Алесі», шпіталізавалі ў адну з берасцейскіх лякарань з падазрэннем на каранавірус», - напісала «Басце» крыніца ў адміністрацыі санаторыя.
«Сяброўка адпачывае цяпер у санаторыі «Алеся» ў Берасцейскай вобласці. У нядзелю яна бачыла, як лекары ў ахоўным адзенне забіралі на хуткай маладую жанчыну з дзіцем. А сёння даслала паведамленне, што ў іх пацвердзілі каранавірус», - паведамляе падпісчыца канала.
Таксама каранавірус знойдзены ў санаторыі «Белая Русь» у курортным пасёлку Нарач Мядзельскага раёна Менскай вобласці.
«Санаторый «Белая Русь» цалкам зачынены на карантын. У аднаго з адпачывальнікаў выяўлены вірус», - паведаміла крыніца «Басты».