Мінабароны Беларусі: Гэта не вайсковыя шпіталі, гэта санітарныя ізалятары

Вайскоўцы пракаментавалі стварэнне палявых аб'ектаў у рэгіёнах Беларусі.

Інфармацыя пра стварэнне «палявых вайсковых шпіталяў» пад Лепелем, Віцебскам і Барысавам з'явілася ў інтэрнэце.

«Гаворка не ідзе пра стварэнне палявых шпіталяў», – сказала «Радыё Свабода» прэс-сакратарка Мінабароны Наталля Гаўрусік. – Гэта абсталяваныя вайсковымі спецыялістамі раёны ізаляцыі. Узброеныя сілы маюць уласную санітарна-эпідэміялагічную службу. Яшчэ на мінулым тыдні вайсковыя лекары правялі трэніроўкі ва ўстаноўцы такіх ізалятараў.

Дзесьці яны паўтаралі працэс устаноўкі такога ізалятара ў казармах, дзесьці гэта было зроблена ў намётах на палігоне. Мы працавалі над гэтым праз эпідэміялагічную сітуацыю ў краіне. У выпадку яе пагаршэння было пастаноўлена яшчэ раз усё адпрацаваць. Такія ізалятары нельга назваць палявымі шпіталямі».

Паводле словаў прэс-сакратара Міністэрства абароны, гаворка не ідзе пра размяшчэнне цывільных асобаў або вайскоўцаў у такіх ізалятарах. Пакуль гэтыя аб'екты не працуюць і ў гэтым няма неабходнасці.

Ва ўстанове дадалі, што раён ізаляцыі, абсталяваны пад Лепелем, ужо разабраны. Пакуль аб'екты застаюцца ў Барысаве (там раён ізаляцыі быў зроблены ў казармах), а таксама на палігоне Ласвіда пад Віцебскам.

Міністэрства абароны паведамляе, што на стан вечару 9 красавіка сярод беларускіх вайскоўцаў не было выпадкаў каранавірусу.