Цяжарныя беларускі просяць абараніць іх ад віруса

Шмат хто на працу ездзіць на грамадскім транспарце праз увесь горад.

Усё больш зваротаў паступае ад цяжарных жанчын, якія просяць абараніць іх ва ўмовах эпідэміі. «Многія прадаўжаюць ездзіць на працу, некаторыя - праз увесь горад дабіраюцца на грамадскім транспарце», - пішуць усхваляваныя беларускі. Некаторыя баяцца нават планавых скрынінгаў, мяркуюць, што для іх паездка ў лякарню і паліклініку - гэта неапраўданая рызыка, піша rebenok.by.

- Для цяжарных жанчын, якія прадаўжаюць ездзіць на працу, не ўвялі ніякіх захадаў дадатковай абароны, - гаворыцца ў адным з такіх лістоў. - Акрамя таго, жанчыны прадаўжаюць хадзіць у паліклінікі на прыёмы і здаюць аналізы ў тых жа кабінетах, што і хворыя. Магчыма, пра такую катэгорыю проста забыліся, а рызыка велізарная!

- А вось як быць цяжарнай жанчыне, калі яна працуе ў паліклініцы ў Менску? Першы трыместр, ёсць невялікае пакашліванне, і тэмпература была 37, але лекар (тэрапеўт цяжарнай) сказала, што субфебрыльная тэмпература ў цяжарных бывае часта, і не дала бальнічны нават на некалькі дзён. Гінеколаг прапанавала на час легчы ў лякарню, але мы адмовіліся. Гэта значыць, у лякарню пакласці можна ў гэтай эпідэміялагічнай сітуацыі, а бальнічны хоць на некалькі дзён даць, каб чалавек пасядзеў у самаізаляцыі і трохі сіл набраўся - нельга?

- Мяне па цяжарнасці адпраўляюць на наступным тыдні ў Віцебск на скрынінг, а я жыву ў Лепелі. Ці можна адмовіцца ад абследавання? Гінеколаг, які вядзе маю цяжарнасць, кажа, што ехаць абавязкова, а я не хачу!

- Зрабілі б так, каб хоць цяжарным, якія працуюць і кантактуюць з вялікай колькасцю людзей (працуюць у паліклініках, аптэках, школах, калі прыйдуць дзеці на вучобу), далі бальнічныя ці неяк па-іншаму паклапаціліся пра іх. Падніміце гэтае пытанне ў Міністэрстве аховы здароўя або ў Мінпрацы, - пішуць чытачы.

У Міністэрстве аховы здароўя мяркуюць, што пагрозы жыццю цяжарным у сувязі з каранавірусам няма. Спецыялісты не бачаць цяжкага і вельмі цяжкага стану ў пацыентак, заражаных вірусам, якія чакаюць дзіця. Паводле інфармацыі на 10 красавіка, у Беларусі зафіксаваныя пяць выпадкаў заражэння COVID-19 сярод цяжарных.

- Спецыфічных захадаў прафілактыкі ад каранавірусу для цяжарных няма, - патлумачыла намесніца міністра аховы здароўя Алена Богдан. - Рэкамендацыі для іх тыя ж, што і для іншых людзей.

У Міністэрстве працы і сацыяльнай абароны не змаглі пракаментаваць пытанне, ці патрэбна цяжарным жанчынам нейкая адмысловая абарона ад дзяржавы. У гэтай тэме спецыялісты міністэрства спасылаюцца на пазіцыю Міністэрства аховы здароўя.

Нагадаем, раней каранавірус быў выяўлены ў пяці цяжарных беларусак.