Зняволеныя іркуцкай калоніі зладзілі бунт

На тэрыторыі калоніі адбыўся пажар.

У іркуцкай папраўчай калоніі №15 асуджаныя парэзалі вены і зладзілі бунт пасля збіцця супрацоўнікам аднаго са зняволеных. На тэрыторыі калоніі адбыўся пажар, паведамляе «Новая газета».

У калоніі строгага рэжыму ў Іркуцкай вобласці бунт. Дзясяткі зняволеных пратэстуюць супраць жорсткіх, на іх думку, дзеянняў кіраўніцтва ПК.

Бунт паспрабавалі здушыць байцы ФСВП, аднак ніякіх вынікаў гэта не дало: зняволеныя проста падпалілі комплекс будынкаў мясцовай лесапільні.

Паводле інфармацыі тэлеканала «Дождь», спецназ адкрыў агонь. Праваабаронца Павел Глушчанка распавёў, што супраць зняволеных ужылі сілу і звязалі іх скотчам.

Праваабаронца Вольга Раманава ў сваім «Фэйсбуку» піша, што «зняволены Андрэй забарыкадаваўся на прамзоне, вакол яго ўсё гарыць». «Ён распавядае пра тое, што дзесьці бачылі трупы. Я спытала, колькі параненых. Ён адказаў - усе», - паведамляе Раманава.

Рэгіянальнае ўпраўленне Следчага камітэта распачало крымінальную справу аб дэзарганізацыі дзейнасці папраўчай установы. Паводле версіі следства, напярэдадні адзін з асуджаных не падпарадкаваўся патрабаванням супрацоўнікаў ПК-15 і нецэнзурна лаяўся ў іх адрас. Некалькі зняволеных «у гэты час нанеслі сабе цялесныя пашкоджанні».

Раней «Рада праваабаронцаў Іркуцкай вобласці» паведаміла, што блізу 20 зняволеных парэзалі сабе вены на знак пратэсту супраць жорсткіх дзеянняў супрацоўнікаў ФСВП. Пазней адзін са зняволеных распавёў «МБХ медиа», што калецтва сабе нанеслі блізу 200 чалавек.

Ва ўпраўленні ФСВП казалі пра напад асуджаных на аднаго з супрацоўнікаў, яго шпіталізавалі. «Пасля правядзення гутаркі і растлумачэння прычын таго, што адбылося асуджаныя адмовіліся ад супрацьпраўных дзеянняў. У сапраўдны момант становішча ва ўстанове кантралюецца», - пазначана ў паведамленні.