У Беларусі з'явіліся новыя асяродкі COVID-19: падрабязная інфармацыя
45- 14.04.2020, 9:57
- 198,211
Маштабы эпідэміі ўражваюць.
Пра новыя асяродкі заражэння каранавірусам у рэгіёнах Беларусі паведаміў тэлеграм-канал «Баста». Звесткі атрыманы ад чытачоў канала.
Берасцейская вобласць, Косава
«Як мінімум, адзін выпадак заражэння ў Косава, мужчына вярнуўся з санаторыя. На вока ўзялі амаль 70 чалавек, з якімі ён бачыўся пасля вяртання», - піша чытач канала.
Берасцейская вобласць, Белаазёрск
«У інфекцыйным аддзяленні гарадской лякарні ляжыць пяць чалавек - студэнты з Віцебска і з Менска, а таксама адзін мужчына пасля замежнай выправы. Яшчэ 27 чалавек з пнеўманіяй у іншым аддзяленні», - піша чытач канала з Белаазёрску.
«У нас у горадзе ўжо практычна тыдзень таму быў заражаны супрацоўнік Бярозаўскай ГРЭС з дыягназам каранавірус. Цяпер ляжыць у абласной лякарні ў Берасці», - паведамляе падпісант «Басты».
Берасцейская вобласць, Драгічынскі раён
«Святара царквы ў аграгарадку Брашэвічы Драгічынскага раёна шпіталізавалі з падазрэннем на каранавірус ў Бездзежскую ўчастковую лякарню. Кантакт першага ўзроўню, быў на пахаванні жанчыны, у сям'і якой быў пацверджаны выпадак каранавіруса», - піша жыхарка аграгарадка.
Віцебская вобласць, Ворша
«Ва ўправе магістральных газаправодаў у Воршы шпіталізавалі аднаго работніка з двухбаковай пнеўманіяй. У яго сына паднялася тэмпература. Ён таксама працуе ў УМГ. Абодвум зрабілі тэст на карону, чакаем вынік», - піша чытач канала з Воршы.
Менская вобласць, Уздзенскі раён
«У санаторыі «Пад’ельнікі» ў Уздзенскім раёне было выяўлена чатыры выпадкі каранавіруснай інфекцыі. Сярод заражаных - і супрацоўнікі, і адпачывальнікі. Санаторый закрыты на карантын», - піша супрацоўнік санаторыя.
Гародня
«У Гародні ў настаўніцы школы, размешчанай у мікрараёне Альшанка, пацвердзілі каранавірус. Забралі таксама настаўнікаў фізкультуры. Школу адправілі на карантын, апрацоўвалі. З суседніх дамоў таксама забіралі людзей», - паведамляе падпісант канала з Гародні.
«Шпіталізаваныя два пенсіянеры з каранавірусам. Іх прывезлі з рэабілітацыйнага цэнтра з-пад Менска. Пры гэтым, адзін з іх некалькі дзён ляжаў у 1-й гарадской клінічнай лякарні ў звычайнай палаце, не маглі паставіць дыягназ. Цяпер у рэанімацыі», - піша яшчэ адзін чытач «Басты» з Гародні.
Гомельская вобласць, Мазыр
«Ёсць новыя выпадкі заражэння. Была ў нядзелю ў прыёмным пакоі гарадской лякарні. Толькі пры мне прывялі двух пнеўманійных хворых. У калідоры быў яшчэ адзін хлопец з пнеўманіяй, пасля якога праводзілася дэзінфекцыя кабінета рэнтгена. Усіх прасілі пачакаць 20 хвілін, каб выветрыць памяшканне. Пасля мяне мужчына таксама быў з пнеўманіяй», - паведамляе падпісчыца канала з Мазыра.
Менская вобласць, Нарач
«Нарач, вуліца Ленінская, 3. У доме праходзіць апрацоўка і дэзінфекцыя пасля таго, як аднаго з жыхароў забралі з падазрэннем на каранавірус. Людзі ў спецадзенні апрацоўваюць усё - з першага да пятага паверха», - паведамляе чытач «Басты».
Магілёў
«Ёсць выпадак каранавіруса на Магілёўскім домабудаўнічым камбінаце, але кіраўніцтва маўчыць, нават дэзінфекцыю не правялі. Сам даведаўся, калі прыйшоў на начную змену», - паведамляе супрацоўнік прадпрыемства.
Магілёўская вобласць, Асіповічы
«Тэлефанавала выхавальніцы ў дзіцячы садок №9, каб даведацца абстаноўку. Яна рэкамендавала не прыводзіць дзіця ў садок, бо там ёсць «кантакты». Якога ўзроўню - не ўдакладняла. Сказала, што аддзел адукацыі забараніў даносіць гэтую інфармацыю да бацькоў», - паведамляе падпісчыца канала з Асіповічаў.
Магілёўская вобласць, Горкі
«Шпіталізаваны двое студэнтаў Беларускай дзяржаўнай сельскагаспадарчай акадэміі. Вучацца на розных факультэтах», - піша жыхар горада.
«У касіркі ў краме «Еўраопт» выявілі каранавірус», - паведамляюць работнікі крамы.
Сцягвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Баста» і стварайце гісторыю свабоднай Беларусі.